जेनजी आन्दोलनलाई राष्ट्रव्यापी बनाउने अभियान सुरु भएको छ : ऋषि धमला

काठमाडौं । पत्रकार ऋषि धमलाले सुशासन, भ्रष्टाचारविरुद्धको अभियान र विकास–समृद्धिको एजेन्डालाई अघि बढाउन जेन्जी आन्दोलनलाई राष्ट्रव्यापी बनाउने अभियान सुरु भएको बताएका छन्।

सोमबार सुदूरपश्चिमका घाइते जेनजीहरूसँग आयोजित अन्तरक्रिया कार्यक्रममा बोल्दै धमलाले युवाहरू नातावाद, भ्रष्टाचार र कुशासनविरुद्ध सडकमा उत्रिएको उल्लेख गर्दै अब यो अभियान देशव्यापी रूपमा विस्तार हुने बताए।

उनले सुदूरपश्चिमका युवाहरूले सुशासन, समृद्धि र विकासका लागि देखाएको सक्रियता देशभरका युवाका लागि प्रेरणादायी रहेको बताए।

उनले भने, ‘सुदूरपश्चिमका युवाहरूले नातावादको विरुद्ध, भ्रष्टाचारको विरुद्ध, सुशासन, समृद्धि र विकासका लागि जेन्जी आन्दोलन गर्नुपर्छ भनेर सडकमा आएका हुन्। आजबाट सुरु भएको सुदूरपश्चिमका जेन्जी घाइतेहरूको यो अभियान अब देशभरि अगाडि बढ्छ।’

धमलाले वर्तमान सरकारलाई जेन्जी पुस्ताको मतबाट बनेको सरकारको रूपमा व्याख्या गर्दै राम्रो काम गर्दा प्रशंसा र कमजोरी हुँदा खबरदारी गर्न युवाहरूको भूमिका महत्वपूर्ण हुने बताए।

उनले परिवर्तन, विकास, रोजगारी, स्वास्थ्य र शिक्षाका क्षेत्रमा सुधारका लागि युवाहरूले निरन्तर दबाब दिनुपर्ने धारणा राखे।

उनले कार्यक्रममा उपस्थित युवाहरूमा देश बदल्ने सोच, क्षमता, इमान्दारिता र समर्पण रहेको उल्लेख गर्दै उनीहरूको भावना र एजेन्डालाई राष्ट्रिय बहसको विषय बनाउन आवश्यक रहेको बताए।

धमलाले अझै पनि कतिपय घाइते युवाहरूले पर्याप्त उपचार नपाएको र विभिन्न समस्यासँग जुधिरहेको उल्लेख गर्दै उनीहरूको समस्या समाधानका लागि आफूहरू साथमा रहने प्रतिबद्धता व्यक्त गरे।

कार्यक्रममा धमलाले घाइते युवाहरूलाई आफ्नो अनुभव, पीडा, सरकारप्रतिको दृष्टिकोण तथा अपेक्षाबारे खुला रूपमा धारणा राख्न आग्रह गर्दै जेन्जीहरूको भावना र अनुभवलाई बुझेर मात्रै देशलाई सही दिशामा अघि बढाउन सकिने बताए।

उनका अनुसार आजको पुस्ताको मुख्य एजेन्डा सुशासन, भ्रष्टाचार अन्त्य, विकास र समृद्धि भएकाले त्यसलाई कार्यान्वयनमा लैजान युवाहरूको सक्रिय सहभागिता आवश्यक छ।