भारतलाई पाकिस्तानका रक्षामन्त्रीको चेतावनी, ‘पानी रोकिए युद्ध हुन सक्छ’

काठमाडौं । पाकिस्तानका रक्षामन्त्री ख्वाजा आसिफले सिन्धु जल सन्धि निलम्बन गरेको विषयलाई लिएर भारतलाई कडा चेतावनी दिएका छन्। पाकिस्तानी टेलिभिजन एआरवाई न्यूजसँगको अन्तर्वार्तामा उनले पाकिस्तानको जल सुरक्षामा खतरा उत्पन्न भए भारतविरुद्ध युद्धसम्मको अवस्था सिर्जना हुन सक्ने बताएका हुन्।

आसिफले भारतले पाकिस्तानको हिस्सामा पर्ने पानीलाई नियन्त्रण गर्ने प्रयास गरिरहेको तथा त्यसलाई रणनीतिक हतियारका रूपमा प्रयोग गरिरहेको आरोप लगाए। यद्यपि, उनले पछिल्लो एक वर्षमा यस विषयमा भएका सबै घटनाक्रमबारे आफू पूर्ण रूपमा जानकार नरहेको पनि स्वीकार गरेका छन्।

सन् २०२५ अप्रिलमा पहलगाममा भएको आतंकवादी हमलामा २६ जनाको मृत्यु भएपछि भारतले सन् १९६० को सिन्धु जल सन्धि निलम्बन गरेको थियो। भारतले सीमापार आतंकवादविरुद्ध पाकिस्तानले प्रभावकारी कदम नचालेसम्म सन्धि पुनः लागू नहुने स्पष्ट पारेको छ।

यसबीच पाकिस्तान गम्भीर जल संकटको सामना गरिरहेको बताइएको छ। विशेषगरी सिन्ध र बलुचिस्तान क्षेत्रमा पानीको अभाव तीव्र बन्दै गएको छ। सिन्ध सिँचाइ विभागका तथ्याङ्कअनुसार उत्तर–पश्चिम नहरमा ६४.१ प्रतिशत, धान नहरमा ३८ प्रतिशत तथा दादु नहरमा ८२ प्रतिशतसम्म पानीको कमी देखिएको छ।

पाकिस्तानको कृषि प्रणालीका लागि महत्वपूर्ण मानिने सुक्कर ब्यारेजमा पनि पानीको स्तर निरन्तर घट्दै गएको बताइएको छ। पानी अभावले कृषि उत्पादन, खाद्य सुरक्षा र समग्र अर्थतन्त्रमा गम्भीर असर पार्ने चिन्ता बढेको छ।