लक्ष्मी सनराइज बैंकको २५औँ वार्षिक साधारणसभा सम्पन्न, १० प्रतिशत बोनस सेयर स्वीकृत

काठमाडौं । लक्ष्मी सनराइज बैंक लिमिटेडको २५औँ वार्षिक साधारणसभा आज मिति २०८२ पौष १४ गते काठमाडौंमा सम्पन्न भएको छ। सभाले बैंकको चुक्ता पूँजीको १० प्रतिशत बोनस सेयर वितरण गर्ने प्रस्ताव सर्वसम्मतिले पारित गरेको छ।

बोनस सेयर वितरणपश्चात बैंकको चुक्ता पूँजी २६ अर्ब ७८ करोड रुपैयाँ पुगेको छ। साधारण सभामा आर्थिक वर्ष २०८१/८२ का लागि संचालक समितिको वार्षिक प्रतिवेदन तथा सोही अवधिको वित्तीय विवरणमाथि छलफल गरी स्वीकृति प्रदान गरिएको छ।

सभाले आगामी आर्थिक वर्ष २०८२/८३ का लागि लेखापरीक्षक नियुक्ति गर्ने निर्णय पनि गरेको छ।

बैंकले आर्थिक वर्ष २०८१/८२ मा ३७१ अर्ब रुपैयाँ निक्षेप संकलन गर्दै २८७ अर्ब रुपैयाँ कर्जा प्रवाह गरेको जनाएको छ। सो अवधिमा बैंकको वासलातको आकार ४४३ अर्ब रुपैयाँ पुगेको छ। यसैगरी, उक्त आर्थिक वर्षमा बैंकले ४ अर्ब ६ करोड रुपैयाँ खुद मुनाफा आर्जन गर्न सफल भएको जानकारी दिइएको छ।

बैंकले आगामी दिनमा डिजिटल बैंकिङ विस्तार, ग्राहक सेवा सुधार तथा सुदृढ वित्तीय व्यवस्थापनमार्फत दिगो विकासमा केन्द्रित रहने प्रतिबद्धता जनाएको छ।