चीनले हरित ऊर्जातर्फको रूपान्तरणलाई गति दिएसँगै ऊर्जा भण्डारण बजारमा तीव्र वृद्धि

काठमाडौं । चीनले हरित ऊर्जाको रुपान्तरणलाई गति दिएसँगै, नयाँ ऊर्जा भण्डारण प्रणालीको माग तीव्र रूपमा बढिरहेको छ ।

पूर्वी चीनको झेजियाङ प्रान्तस्थित नराडा पावरको उत्पादन केन्द्रमा ठूलो–ठूलो चाँदी–सेतो रङका क्याबिनेटका पङ्क्तिहरू व्यस्त उत्पादनको संकेत दिन्छन् । यी विशाल “पावर बैंक” हरुले हावा र घामबाट उत्पादित विद्युत् भण्डारण गर्छन् र माग उच्च हुने समयमा आपूर्ति गर्न प्रयोग गरिन्छ ।

केन्द्रका महाप्रबन्धकका अनुसार, यस वर्ष उत्पादन गतिविधि झनै तीव्र भएको छ । उत्पादन लाइनबाट निस्कँदै गरेका युनिटहरू प्रायः तुरुन्तै बजारतर्फ पठाइन्छन् । तन जियानगुओ, महाप्रबन्धक, लिन’आन उत्पादन केन्द्र, नराडा पावरका अनुसार “हाम्रो दैनिक उत्पादन क्षमता २० मेगावाट–घन्टा पुग्छ, जुन चारवटा भण्डारण कन्टेनर युनिटको बराबरी हो । प्रत्येक युनिटले करिब ५० परिवारलाई एक दिनको विद्युत् आपूर्ति गर्न सक्छ । यो वर्षको सुरुदेखि नै हाम्रो उत्पादन लाइन पूर्ण क्षमतामा चलिरहेको छ, र आगामी वर्षको पहिलो तथा दोस्रो त्रैमासिकसम्म पनि यसैगरी चलिरहनेछ भन्ने अपेक्षा छ ।”

उनका अनुसार, यस वर्ष अर्डरमा उल्लेख्य वृद्धि भएको छ र सिपमेन्ट पनि ८० प्रतिशतभन्दा बढीले बढेको छ । विशेषगरी विद्युत् उत्पादन र ग्रिड प्रयोजनका लागि प्रयोग हुने ठूला भण्डारण प्रणालीहरू मुख्य वृद्धि स्रोत बनेका छन् ।

तन जियानगुओका अनुसार “हाम्रा ठूला भण्डारण प्रणालीका झिकाइहरू गत वर्षको तुलनामा तीन गुणाले बढेका छन् । हामी ग्रिड सञ्चालनकर्ता, नयाँ ऊर्जा उत्पादक कम्पनीहरू तथा विभिन्न ठूला ऊर्जा समूहसँग मिलेर सेवा प्रदान गर्दै आएका छौँ ।”

चीनको राष्ट्रिय ऊर्जा प्रशासनका तथ्यांकअनुसार, सेप्टेम्बरसम्म चीनको नयाँ ऊर्जा भण्डारणको स्थापित क्षमता १० करोड किलोवाट नाघेको छ, जुन विश्व कुल क्षमताको ४० प्रतिशतभन्दा बढी हो । सीसीटीभी