सांसद चौधरीको मुद्दामा अदालतका कर्मचारीको लापरवाही, भेटियो किर्ते हस्ताक्षर

यज्ञराज उपाध्याय, काठमाडौं । नागरिक उन्मुक्ति पार्टीका सांसद तथा कैलाली क्षेत्र नं. २ को प्रतिनिधि सभा सदस्य अरुण कुमार चौधरीको मुद्दा जिल्ला अदालत कैलालीले फैसला गरेको एक दशकपछि कार्यान्वयन भएको छ ।

२०६६ भदौ ३ गते ढुंगा बोकेर चिसापानीबाट लम्की तर्फ गइरहेको लु.२ त २११ नम्बरको ट्याक्टरमा आगजनी गरेको भन्दै महादेव बज्गाईको २०६७ भदौ २ गतेको जाहेरीले जिल्ला अदालत कैलालीका तत्कालीन न्यायाधीश विष्णु सुवेदीको इजलासले २०७० बैशाख ९ गते सांसद चौधरीसहित वीरबहादुर चौधरी, पर्शुराम चौधरीलाई दोषी ठहर गर्दै ६ महिना कैद सजाय र ८ लाख १९ हजार ४२३ रुपैयाँ विगो भराउने फैसला गरेको थियो ।

एक दशकपछी यो मुद्दा सक्रिय हुँदा अदालतका केही कमजोरीमाथी पनि प्रश्न गर्ने ठाउँ रहेको सांसद चौधरीका अधिवक्ता सरोज बुढाथोकीले बताउनुभएको छ । उनका अनुसार सांसद चौधरीका अदालत गएर हस्ताक्षर नगरेको भएता पनि अदालतका कर्मचारीले किर्ते हस्ताक्षर गरेको पाइएको छ ।

करिङ्गा चौधरी जो सांसद अरुणकुमार चौधरीका बुवा हुन् । म्याद तामेल समाहवानका क्रममा छोरा उपस्थित हुन नसकेपछी बुवाको नाम राखेर अदालतका कर्मचारीले किर्ते हस्ताक्षर गरेको अधिवक्ता बुढाथोकीको दाबी छ । २०६७ मंसिर ९ गतेको समाहवानमा यस्तो उहाँले जानकारी दिनुभयो । “अरुण जी अदालतमा उपस्थित हुन नसकेपछि परिवारको एकजनालाई उपस्थित गराएर हस्ताक्षर गराउनुपर्थ्यो, तर बुवासमेत अदालतमा उपस्थित नहुदासमेत २०६७/०८/०९ गते लेखिएको कागजमा बुवाको नाम राखेर अदालतका कर्मचारी आफैले हस्ताक्षर गरेको भेटिएको छ,” अधिवक्ता बुढाथोकीले बताउनुभयो, “बुवा पनि अदालतमा उपस्थित हुनुहुन्थेन र कमसेकम आफ्नो नाम ‘करिङ्गा’ लेख्न सक्ने मान्छेको हस्ताक्षरसहितको प्रमाण मसँगै छ, यसमा उहाँको हस्ताक्षर हेर्दा र बुवाले अन्य ठाउँमा गरेको हस्ताक्षर हेर्दा किर्ते हस्ताक्षर भएको सहजै पुष्टि हुन्छ र बुवाले अदालत गएर म्याद बुझ्नुभएको पनि छैन अनि कसरी उहाँको हस्ताक्षर भेटियो ?”

यस्तै गाउँका अन्य जसको रहोवरमा गरिएको भनिएको छ उनीहरु त्यो वडामै नबस्ने गरेको पाइएको पनि अधिवक्ता बुढाथोकीले जानकारी दिनुभयो । उहाँले भन्नुभयो, “गाउँका जस्को रहोवरमा गरिएको भनेर नाम लेखिएको छ उहाँहरु त्यो वडामै नबस्ने गरेको पाइएको छ । अदालतले कतिसम्मको किर्ते काम गरेको छ यसैबाट थाहा हुन्छ ।”

एक दशकसम्म खुलमखुल्ला हिड्दासमेत कसैले मुद्दा लागेको वा फरार भएकोसम्म नभनेको र यो बीचमा स्थानीय तह, प्रदेश सभा देखि प्रतिनिधि सभाको चुनाव लड्दा पनि कसैलाई हेक्का नभएको प्रति पनि अधिवक्ता बुढाथोकीको आपत्ती जनाउनुभएको छ ।

अहिले एकाएक यो विषयमा बाहिर आएपछि सांसद चौधरी गृहजिल्ला जाँदै गर्दा बिहीवार बाँकेको कोहलपुरमै प्रहरीले पक्राउ गरेर काठमाडौं पठाएको थियो । चौधरीलाई बिहीवार नै धनगढी पठाएर शुक्रवार जिल्ला अदालतमा उपस्थिति गराइएको हो । अहिले सांसद चौधरीलाई जिल्ला कारागार चलान गरिएको छ ।

अन्य कागजातमा सांसद अरुण कुमार चौधरी बुवाको हस्ताक्षर       

  अदालतकोमा बुवाको हस्ताक्षर