विचार र सिद्धान्त नमिल्दाको असर सत्ता गठबन्धनमा देखिदै

यज्ञराज उपाध्याय, काठमाडौं । बुधबार संसद बैठकमा सत्ता साझेदार दलभित्रै केही खटपट देखियो । सत्ता गठबन्धनमा सामेल राष्ट्रिय प्रजातन्त्र पार्टी (राप्रपा) का सांसदले हिन्दुराष्ट्र कायम गर्ने, राजासहितको प्रजातन्त्र लगायतका विषय आफ्नो एजेन्डा भएको अभिव्यक्ति राखेपछि माओवादी नेता शक्ति बस्नेतले असन्तुष्टि जनाएका थिए ।

सत्ता गठबन्धन नै दुई धारमा विभाजन भएको भान हुनेगरी बुधबार प्रतिनिधि सभाको बैठकमा सत्तापक्षकै सांसदहरुबीचको जुहारी चलेको थियो । नेकपा (एमाले) का नेता रघुजी पन्तले सहरी विकासमन्त्री विक्रम पाण्डेले केही दिन अघि गृहजिल्ला चितवनको एक कार्यक्रममा संघीयता विरोधी अभिव्यक्ति दिएको भन्दै आपत्ती जनाएका थिए । उनले संविधान र कानुनको परिधिभित्र रहेर मन्त्रीहरु चल्नुपर्नेमा त्यसविपरीत जानू देशका लागि हितकर नहुने बताएका थिए ।

संसद बैठकमै राप्रपाका महामन्त्री एवं प्रतिनिधि सभा सदस्य धवल शमसेर राणाले आफ्नो पार्टीको मुल एजेन्डा हिन्दु राष्ट्र कायम गर्ने र राजासहितको प्रजातन्त्र रहेको भन्दै यसबाट आफू पछि नहट्ने अभिव्यक्ति राखेका थिए । उनको अभिव्यक्तिमा माओवादीका उपमहासचिव शक्ति बस्नेतले आपत्ती जनाए । त्यस्तै राप्रपा नेता ज्ञानेन्द्र शाहीले माता सीता नेपालकी छोरी, विश्व प्रसिद्ध ग्रन्थ वेद नेपालको भन्दै नियमापत्ती जनाएका थिए ।

यी सबै कुरालाई नियाल्दा सत्ता गठबन्धनभित्रै भइरहेको खटपटले सरकारमा कस्तो असर पर्ला भन्ने आम जिज्ञासा रहेको छ । राप्रपाका सहायक महामन्त्री ऋषिराज देवकोटाले संसदमा सवालजवाफ हुनु प्रजातन्त्रको सुन्दर पक्ष भएको भन्दै त्यसले वर्तमान सरकारमा कुनै असर नपर्ने दाबी गरेका छन् ।

सेतोखबरसँग कुरा गर्दै उनले देशलाई निकास दिनका लागि सरकारमा सहभागी हुनु परेको दाबी गर्दै राप्रपा आफ्नो विचार, सिद्धान्त, एजेन्डामा अडिग रहेको बताए । संसद भवन भनेको देशैभरबाट जनताको प्रतिनिधित्व गर्दै आउने जनप्रतिनिधिहरुको साझा ठाउँ र कानुन बनाउने थलो भएकाले आफ्नो र दलको एजेन्डा, धारणा प्रस्तुत गर्न पाउने संवैधानिक अधिकारअन्तर्गत बहस हुनुलाई नकारात्मक भन्न नमिल्ने देवकोटाले बताए ।

“संसद भवनमा सवालजवाफ हुनुलाई नराम्रो भन्न मिल्दैन, हामी हाम्रा एजेन्डाहरुमा अडिग छौं,” उनले भने, “यसले सरकारमा असर पर्छ जस्तो लाग्दैन, देशलाई निकास दिनका लागि राप्रपा पनि सरकारमा सहभागी हुनु परेको हो र परिस्थिति अनुसार के हुने भन्ने कुरा फरक हो ।”

राप्रपाले बिहीवार दिउँसो पार्टी कार्यालयमा केन्द्रिय कार्यसमादन समिति बैठक बोलाएको छ । पछिल्लो समय सत्ता गठबन्धन भित्रै खटपट बढ्दै गएपछि समसामयिक राजनीतिक परिस्थितिको समीक्षा गर्न र पार्टीको आगामी कार्यक्रमबारे छलफल गर्न बैठक बोलाइएको सहायक महामन्त्री देवकोटाले जानकारी दिए । बैठकमा सरकारका विषयमा कुनै चर्चा नहुनेसमेत उनले बताए । खटपट बढ्दै गएपछी राप्रपा सरकारमा रहिरहने कि बाहिरिने भन्ने जिज्ञासा बढ्न थालेपछि यो विषयमा बैठकमा कुनै छलफल होला कि नहोला भन्ने प्रश्नमा देवकोटाले सरकारबाट बाहिरिने विषयमा अहिलेसम्म कुनै छलफल नभएको र यसको जिम्मा स्वयं प्रधानमन्त्रीकै भएको बताए । प्रधानमन्त्रीले सरकारबाट बाहिरिनुपर्ने संकेत गरे बाहिरिने नत्र आफ्ना एजेन्डाअनुरुप सरकारमै रहिरहनेसमेत जानकारी दिए ।

“सरकारबाट बाहिरिने विषयमा कुनै छलफल नै भएको छैन । तथापि यो राप्रपा सरकारबाट बाहिरिनुपर्ने प्रधानमन्त्रीबाट संकेत भएपछी बाहिरिन सकिन्छ,” उनले भने, “हामी जबर्जस्ती सरकारमा सहभागी भएका हैनौं । कुनै पनि दलले एक्लै सरकार बनाउनसक्ने अवस्था नभएपछी देशलाई निकास दिने उद्देश्यले सरकारमा सहभागी हुनु परेको हो ।”