सेतो खबरद्वारा प्रकाशित गरिएको हो |
काठमाडौं । उदाउँदो सूर्यलाई अर्घ दिएसँगै चारदिने छठ पर्व विधिवत् रूपमा सम्पन्न भएको छ। छठ पर्वको अन्तिम दिन आज बिहान व्रतालुहरूले नदी, पोखरी तथा जलाशयका किनारमा पुगेर उदाउँदो सूर्यलाई अर्घ अर्पण गरेका हुन्।
सूर्य उपासनाको परम्परासँग जोडिएको छठ पर्वमा अस्ताउँदो र उदाउँदो दुवै सूर्यको पूजा गर्ने विशेष धार्मिक विधि रहेको छ। यसअघि पर्वको तेस्रो दिन हिजो साँझ व्रतालुहरूले अस्ताउँदो सूर्यलाई अर्घ दिएका थिए।
छठ पर्वलाई सत्य, अहिंसा, आत्मशुद्धि तथा सबै जीवप्रति सहानुभूति राख्न प्रेरित गर्ने पर्वका रूपमा लिइन्छ। संस्कृतिविद्हरूका अनुसार यस पर्वले मानव जीवनमा धार्मिक आस्था, अनुशासन र सामाजिक सद्भावको महत्त्वलाई समेत उजागर गर्छ।
पारिवारिक सुख, शान्ति, समृद्धि, शारीरिक कल्याण, रोगव्याधिबाट मुक्ति तथा मनोकामना पूरा हुने विश्वासका साथ श्रद्धालुहरूले छठ पर्व मनाउने गर्छन्। यस अवसरमा नदी, पोखरी, तलाउ तथा अन्य जलाशयका किनारमा व्रतालु र श्रद्धालु भक्तजनको ठूलो भीड लाग्ने गर्दछ।
धार्मिक मान्यताअनुसार छठ पर्वको सम्बन्ध महाभारतकालीन घटनासँग पनि जोडिएको छ। महाभारतमा उल्लेख भएअनुसार द्रौपदीसहित पाण्डवहरू अज्ञातवासमा रहँदा आफ्नो गुप्तवास सफल होस् भन्ने कामनासहित सूर्यदेवको आराधना गरेका थिए।
लोककथनअनुसार त्यस समयमा पाण्डवहरू मिथिलाको किराँत राजाको क्षेत्रमा बसेका थिए। सोही समयदेखि मिथिला क्षेत्रमा छठ पर्व मनाउने परम्परा सुरु भएको जनविश्वास रहिआएको छ।
विशेषगरी तराई–मधेस क्षेत्रमा धुमधामका साथ मनाइने छठ पर्व पछिल्लो समय काठमाडौं उपत्यकालगायत देशका विभिन्न भागमा समेत व्यापक रूपमा मनाउन थालिएको छ। अस्ताउँदो र उदाउँदो सूर्यलाई अर्घ अर्पण गर्दै मनाइने यस पर्वले प्रकृति, जल र सूर्यप्रतिको सम्मानलाई समेत झल्काउने गर्दछ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा