सेतो खबर
काठमाडौं ।अमेरिका र इरानबीच युद्धविरामको सम्भावनाबारे वार्ता भइरहेका बेला शुक्रबार अन्तर्राष्ट्रिय बजारमा कच्चा तेलको मूल्य घटेको छ।
मध्यपूर्वमा जारी द्वन्द्वका कारण तेल आपूर्तिमा अवरोध आउन सक्ने चिन्ता कायमै रहे पनि युद्धविरामको सम्भावनाले बजारमा केही दबाब कम गरेको बताइएको छ। साउदी अरेबियामा हुथी विद्रोहीहरूको आक्रमण बढेपछि क्षेत्रीय तेल आपूर्तिलाई लिएर लगानीकर्ताको चासो बढेको थियो।
शुक्रबार ब्रेन्ट क्रुडको मूल्य १.४७ डलर अर्थात् १.४ प्रतिशतले घटेर प्रति ब्यारेल १०५.११ डलरमा पुगेको छ। यस्तै, वेस्ट टेक्सास इन्टरमिडिएट (डब्ल्यूटीआई) को मूल्य २ डलर अर्थात् २.१ प्रतिशतले घटेर प्रति ब्यारेल ९२.६१ डलरमा झरेको छ।
एक सातादेखि अस्थिर कारोबार भइरहेको तेल बजारमा शुक्रबार पनि मूल्य घटेर कारोबार सुरु भएको हो। अमेरिकाको न्युयोर्कमा अमेरिकी र इरानी वार्ताकारहरूबीच द्वन्द्व अन्त्य गर्ने सम्भावित बाटोबारे छलफल भइरहेको बताइएको छ।
वार्तासँग परिचित स्रोतहरूका अनुसार इरानले होर्मुज जलमार्ग पुनः खोल्ने र अमेरिकाले इरानमाथि लगाएको आर्थिक नाकाबन्दी हटाउने विषयमा समेत छलफल भइरहेको छ। होर्मुज जलमार्ग विश्वको महत्वपूर्ण तेल ढुवानी मार्गमध्ये एक भएकाले यसको सञ्चालनले अन्तर्राष्ट्रिय तेल आपूर्तिमा प्रत्यक्ष प्रभाव पार्न सक्छ।
यसैबीच, बिहीबार इरानी राष्ट्रपति मसूद पेजेश्कियानले युद्ध कहिले अन्त्य हुन्छ भन्ने निर्णय अमेरिकाले गर्ने बताएका थिए।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
