चक्कु प्रहारबाट बागलुङमा श्रमिकको हत्या, एक जना पक्राउ

बागलुङको काठेखोला गाउँपालिका–३ धम्जामा चक्कु प्रहारबाट एक मजदुरको हत्या भएको छ।

मृत्यु हुनेमा ढोरपाटन नगरपालिका–७ का ४० वर्षीय अशोक खत्री रहेका छन्। उनी धम्जा माझकटेरामा मजदुरी गर्दै बस्दै आएका थिए।

प्रहरीका अनुसार गएराति आपसी विवादका क्रममा उनीसँगै मजदुरी गर्दै आएका ढोरपाटन नगरपालिका–५ का २५ वर्षीय अर्जुन घर्तीले खत्रीमाथि चक्कु प्रहार गरेका थिए।

गम्भीर घाइते भएका खत्रीको घटनास्थलमै मृत्यु भएको प्रहरीले जनाएको छ। दुवै जना स्थानीय निर्मल आधारभूत विद्यालयको भवन निर्माणमा मजदुरी गर्दै आएका थिए।

घटनापछि प्रहरीले घर्तीलाई पक्राउ गरेको छ। घटनाबारे थप अनुसन्धान भइरहेको जिल्ला प्रहरी कार्यालय बागलुङले जनाएको छ।