सर्वोच्चको आदेशलाई सम्मान गर्छौं, विशेष महाधिवेशनको औचित्य फेरि पुष्टि हुन्छ’

काठमाडौं– नेपाली कांग्रेसका सभापति गगनकुमार थापाले कांग्रेसको आधिकारिकतासम्बन्धी विवादमा सर्वोच्च अदालतले दिएको पछिल्लो आदेशलाई सम्मान गर्ने बताएका छन्।

शुक्रबार काठमाडौंमा आयोजित नेपाल लोकतन्त्रवादी आदिवासी जनजाति महासंघको दोस्रो राष्ट्रिय सम्मेलन उद्घाटन समारोहलाई सम्बोधन गर्दै थापाले सर्वोच्चको आदेशपछि स्वाभाविक रूपमा केही प्रश्न उठे पनि पार्टी अदालतको प्रक्रियाप्रति पूर्ण सम्मानका साथ अघि बढ्ने बताए।

उनले कांग्रेसको विधानअनुसार सार्वभौम महाधिवेशन प्रतिनिधिको बहुमत उपस्थितिमा विशेष महाधिवेशन सम्पन्न भएको दाबी गर्दै त्यसको वैधानिकता निर्वाचन आयोगले स्वीकार गरिसकेको बताए। उनका अनुसार विशेष महाधिवेशनको निर्णयलाई सर्वोच्च अदालतले समेत मान्यता दिइसकेको छ।

थापाले अब थप पुष्टिका लागि पुनरावलोकन वा समीक्षा गर्नुपर्ने अवस्था आए त्यसलाई पनि सकारात्मक रूपमा लिने बताए।

उनले भने, ‘विशेष महाधिवेशनको वैधानिक मान्यता निर्वाचन आयोगले दिइसकेको छ। त्यसलाई सर्वोच्च अदालतले पनि स्वीकार गरिसकेको छ। अब फेरि पुष्ट्याइँ गर्नुपर्ने भनेको छ भने त्यसलाई पनि हामी सम्मान गर्छौं।’

सभापति थापाले आफू पार्टी नेतृत्वमा रहँदा जिम्मेवारीप्रति सचेत रहेको बताउँदै कांग्रेसलाई एकताबद्ध बनाएर अघि बढाउने प्रयास जारी रहने बताए।

विशेष महाधिवेशनमा सहभागी नभएका नेता तथा कार्यकर्तालाई समेत आगामी पन्ध्रौँ महाधिवेशनसम्म समेट्ने प्रयास भइरहेको उनले जानकारी दिए।