सुनसरी घटनापछि स्वास्थ्यमन्त्री मेहता विराटनगरमा, तीन अस्पताल पुगेर घाइतेको स्वास्थ्य अवस्था बुझ्दै

विराटनगर । सुनसरीमा भएको घटनामा घाइते भएकाहरूको स्वास्थ्य अवस्थाबारे जानकारी लिन स्वास्थ्य तथा जनसंख्यामन्त्री मेहता बुधबार विराटनगर पुगेका छन्।

मन्त्री मेहताले विराटनगरस्थित कोशी अस्पताल, नोबेल शिक्षण अस्पताल र विराट मेडिकल कलेज शिक्षण अस्पताल पुगेर उपचाररत घाइतेहरूको स्वास्थ्य अवस्थाबारे चिकित्सकसँग जानकारी लिएका छन्। उनले घाइतेहरूलाई आवश्यक उपचारमा कुनै कमी हुन नदिन अस्पताल प्रशासनलाई निर्देशनसमेत दिएका छन्।

अस्पताल निरीक्षणका क्रममा मन्त्री मेहताले उपचारमा संलग्न चिकित्सक तथा स्वास्थ्यकर्मीसँग छलफल गर्दै घाइतेहरूको उपचारका लागि आवश्यक औषधि, उपकरण तथा अन्य स्वास्थ्य सेवाको उपलब्धता सुनिश्चित गर्न सरकार प्रतिबद्ध रहेको बताएका छन्।

उनले घाइतेहरूको शीघ्र स्वास्थ्य लाभको कामना गर्दै आवश्यक परे थप उपचार तथा समन्वयका लागि स्वास्थ्य मन्त्रालयबाट आवश्यक सहयोग उपलब्ध गराइने विश्वास दिलाए।

सुनसरीमा भएको घटनापछि घाइतेहरूको उपचार विभिन्न अस्पतालमा भइरहेको छ भने घटनाबारे सम्बन्धित निकायले थप अनुसन्धान अघि बढाइरहेको छ।