सेतो खबर
काठमाडौं । बैंकिङ कसुरको आरोपमा पक्राउ परेका चर्चित सेफ तथा मिथिला थालीका सञ्चालक सन्तोष साह (सेफ सन्तोष)लाई थप अनुसन्धानका लागि तीन दिन हिरासतमा राख्न अदालतले अनुमति दिएको छ।
जिल्ला अदालत काठमाडौंले सोमबार प्रहरीको मागअनुसार साहलाई तीन दिन हिरासतमा राखेर अनुसन्धान गर्न अनुमति दिएको हो। अदालतको आदेशसँगै प्रहरीले उनीमाथि लागेको आरोपबारे थप अनुसन्धान अघि बढाउने भएको छ।
उपत्यका अपराध अनुसन्धान कार्यालयको टोलीले साहलाई शनिबार जनकपुरबाट पक्राउ गरेको थियो। बैंकिङ कसुरसम्बन्धी उजुरीका आधारमा पक्राउ गरिएका उनलाई त्यसपछि काठमाडौं ल्याइएको थियो।
प्रारम्भिक अनुसन्धानपछि अपराध अनुसन्धान कार्यालयले थप कारबाही र अनुसन्धानका लागि साहलाई जिल्ला प्रहरी परिसर काठमाडौं, भद्रकालीको जिम्मा लगाएको थियो। प्रहरीले हिरासतमा राख्न म्याद थपका लागि सोमबार बिहान अदालत खुलेलगत्तै उनलाई जिल्ला अदालत काठमाडौंमा उपस्थित गराएको थियो।
हाल प्रहरीले बैंकिङ कारोबारसँग सम्बन्धित विषयमा आवश्यक कागजात संकलन तथा बयान लिने प्रक्रिया अघि बढाएको जनाएको छ। साहमाथि लागेको आरोपको विस्तृत विवरण भने प्रहरीले सार्वजनिक गरेको छैन।
सेफ सन्तोष नेपाली पाककलाका चर्चित व्यक्तित्वमध्ये एक मानिन्छन्। उनले नेपाली तथा मिथिला परिकारलाई अन्तर्राष्ट्रिय स्तरमा परिचित गराउन भूमिका खेलेका छन्। उनको पक्राउसँगै सामाजिक सञ्जाल तथा विभिन्न क्षेत्रबाट चासो व्यक्त गरिएको छ।
प्रहरीले घटनाबारे अनुसन्धान जारी रहेको र अनुसन्धानको निष्कर्षपछि थप कानुनी प्रक्रिया अघि बढाइने जनाएको छ।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
