भारतमा फेरि बढ्यो पेट्रोल–डिजेलको मूल्य

एजेन्सी । अन्तर्राष्ट्रिय बजारमा कच्चा तेलको मूल्य निरन्तर बढिरहेपछि भारतमा पेट्रोल र डिजेलको मूल्य पुनः वृद्धि गरिएको छ। भारतीय सरकारी तथा निजी तेल कम्पनीहरूले शुक्रबारदेखि लागू हुने गरी पेट्रोल र डिजेल दुवैको मूल्य बढाएको भारतीय सञ्चारमाध्यमहरूले जनाएका छन्।

भारतीय दैनिक भारस्कर का अनुसार पेट्रोल प्रतिलिटर २.६१ भारतीय रुपैयाँ र डिजेल २.७१ रुपैयाँले महँगिएको हो। नयाँ मूल्यसूची लागू भएसँगै भारतका प्रमुख सहरहरूमा इन्धनको मूल्यले नयाँ उचाइ छोएको छ।

नयाँ दरअनुसार भारतको राजधानी दिल्लीमा पेट्रोल प्रतिलिटर १०२.१२ भारु पुगेको छ भने डिजेल ९५.२० भारुमा कारोबार भइरहेको छ। यस्तै, मुम्बई, कोलकाता र चेन्नईजस्ता महानगरहरूमा पेट्रोलको मूल्य प्रतिलिटर १०७ देखि ११३ भारुसम्म पुगेको बताइएको छ।

भारतीय बजारमा मे महिनामै इन्धनको मूल्य बढाइएको यो चौथो पटक हो। यसअघि मे १५ मा प्रतिलिटर ३ रुपैयाँ, मे १९ मा औसत ९० पैसा तथा मे २३ मा पनि पेट्रोल–डिजेलको मूल्य बढाइएको थियो। लगातारको मूल्यवृद्धिले उपभोक्तामाथि थप आर्थिक भार परेको छ।

विशेषज्ञहरूका अनुसार अन्तर्राष्ट्रिय बजारमा कच्चा तेलको मूल्य बढ्नु, भू–राजनीतिक तनाव, तेल उत्पादक राष्ट्रहरूको उत्पादन नीतिमा आएको परिवर्तन तथा डलर विनिमय दरको प्रभावका कारण इन्धन महँगिएको हो।

इन्धनको मूल्यवृद्धिले भारतमा सार्वजनिक यातायात, ढुवानी तथा दैनिक उपभोग्य वस्तुको मूल्यमा समेत असर पार्न सक्ने अनुमान गरिएको छ। पेट्रोलियम पदार्थको मूल्य बढेसँगै महँगी थप चर्किन सक्ने भन्दै सर्वसाधारणले चिन्ता व्यक्त गर्न थालेका छन्।

भारतमा इन्धनको मूल्यवृद्धिको प्रभाव नेपालमा पनि पर्न सक्ने अनुमान गरिएको छ। नेपाल आयल निगमले भारतबाटै पेट्रोलियम पदार्थ आयात गर्ने भएकाले भारतीय बजारमा मूल्य बढ्दा नेपाली बजारमा पनि मूल्य समायोजनको दबाब पर्ने सम्भावना रहन्छ।