एमाले महासचिवले दिए बालेन शाहलाई शुभकामना

काठमाडौं । शंकर पोखरेलले परिवर्तनको लहरका सामु आफूहरू सफल हुन नसकेको बताएका छन्।

नेकपा एमालेका महासचिवसमेत रहेका पोखरेल दाङ निर्वाचन क्षेत्र नम्बर–२ का उम्मेदवार थिए। सो क्षेत्रमा उनी पराजित हुने निश्चित भएसँगै उनले परिवर्तनको लहरका कारण आफ्नो जित सुनिश्चित हुन नसकेको बताएका हुन्।

सामाजिक सञ्जालमार्फत प्रतिक्रिया दिँदै उनले लेखेका छन्, “यस पटकको निर्वाचनमा म उम्मेदवार भएको निर्वाचन क्षेत्रमा पार्टीका नेता तथा कार्यकर्ताहरूले निकै मेहनत गर्नुभयो। शुभेच्छुक र आफन्तजनहरूले पनि उत्तिकै साथ र सहयोग दिनुभयो। तर ‘परिवर्तन’ को लहरका सामु हाम्रो प्रयास सफल हुन सकेन।”

पोखरेलले लोकतान्त्रिक प्रक्रियामा हार–जित स्वाभाविक हुने उल्लेख गर्दै विजयी उम्मेदवारलाई बधाई दिएका छन्। साथै उनले प्रधानमन्त्रीका उम्मेदवार मानिएका बालेन्द्र शाह सहित निर्वाचित सबै प्रतिनिधिलाई सफल कार्यकालको शुभकामना व्यक्त गरेका छन्।

उनले जनताको अभिमतलाई सम्मान गर्दै लोकतान्त्रिक मूल्य र प्रक्रियाप्रति प्रतिबद्ध रहने पनि बताएका छन्।