जेन्जी आन्दोलनका क्रममा फरार रहेका चोरी मुद्दाका कैदी पक्राउ

हेटौँडा। जेन्जी आन्दोलनका क्रममा कारागारबाट फरार भएका चोरी मुद्दाका एक कैदीलाई जिल्ला प्रहरी कार्यालय मकवानपुरले पक्राउ गरेको छ।

पक्राउ पर्नेमा मकवानपुरको बागमती गाउँपालिका–५ निवासी २५ वर्षीय शिशिर परियार रहेका छन्।

जिल्ला प्रहरी कार्यालय मकवानपुरका अनुसार शिशिर परियारविरुद्ध चोरी (मोटरसाइकल चोरी) मुद्दामा सम्मानित मकवानपुर जिल्ला अदालतमा दर्ता भएको मुद्दा नं. ०८१–ऋ१–०३०६ मा सुरुमा रु. १ लाख धरौटी माग गरिएको थियो। धरौटी रकम बुझाउन नसकेपछि उनी कारागार कार्यालय भीमफेदी चलान भएका थिए।

पछि मिति २०८२ पुस १४ गते अदालतबाट भएको अन्तिम फैसलाअनुसार परियारलाई १ वर्ष ३ महिना कैद सजाय तोकिएको थियो। उनी उक्त सजाय भुक्तान गरिरहेका बेला जेन्जी आन्दोलनका क्रममा कारागारबाट भागी फरार भएका थिए।

फरार प्रतिवादीको खोजतलासलाई तीव्र बनाएको प्रहरीले विशेष सूचनाका आधारमा लुकीछिपी बसेको अवस्थामा हेटौँडा बसपार्क क्षेत्रबाट उनलाई नियन्त्रणमा लिएको जनाएको छ। पक्राउपछि उनलाई बाँकी कैद सजाय भुक्तानका लागि पुनः कारागार पठाउने प्रक्रिया अघि बढाइएको प्रहरीले जनाएको छ।

जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्रीले आन्दोलनका क्रममा फरार भएका व्यक्तिहरूको खोजी कार्य निरन्तर जारी रहेको बताए। उनका अनुसार कानुनी कारबाहीबाट बच्न लुकीछिपी बसेका फरार व्यक्तिहरूलाई एक–एक गरेर नियन्त्रणमा लिने अभियानलाई प्रहरीले थप प्रभावकारी बनाएको छ।

प्रहरीले अदालतबाट सजाय तोकिएका तथा फरार रहेका प्रतिवादीहरूलाई कानुनी दायरामा ल्याउने कार्यलाई प्राथमिकताका साथ अघि बढाइएको जनाएको छ।