सेतो खबर
चितवन । रवि लामिछानेले आफूलाई राजनीतिक रूपमा कमजोर पार्ने उद्देश्यले विभिन्न किसिमका घेराबन्दी र दबाबका प्रयास गरिए पनि ती सफल हुन नसकेको बताएका छन्।
मंगलबार चितवन–१ मा आयोजित चुनावी सभालाई सम्बोधन गर्दै उनले मध्यरातमा आफ्नै बेडरुममा छिरेर ‘अन्तिम इच्छा के हो?’ भनेर सोधिएको घटनाको स्मरण गरे। उक्त घटनाप्रति संकेत गर्दै उनले त्यसबेला आफूले कुनै प्रतिक्रिया नदिएको तर अब त्यसको जवाफ जनताले मतदानमार्फत दिने बताए।
उनले भने, “हामीलाई घेराबन्दी गरेर सखाप गर्न खोजिएको थियो। मध्यरातमा बेडरुममा छिरेर ‘तेरो अन्तिम इच्छा के हो?’ भनेर सोधियो। त्यतिखेर मैले जवाफ दिइनँ। मेरो अन्तिम इच्छा के हो भन्ने कुरा फागुन २१ गते तपाईंहरूले भन्नु पर्नेछ।”
राष्ट्रिय स्वतन्त्र पार्टीका सभापति लामिछानेले आगामी फागुन २१ गतेको मतदानलाई सामान्य निर्वाचन मात्र नभई परिवर्तनको निर्णायक अवसरका रूपमा व्याख्या गरे। लामो समयदेखि जनताले देख्दै आएको अपेक्षा र असन्तुष्टिको सम्बोधन गर्ने जिम्मेवारी यसपटक मतदातामाथि रहेको उनको भनाइ थियो।
उनले राजनीतिक पहुँचका आधारमा राज्य संयन्त्रलाई भर्ती केन्द्र बनाउने, स्रोत–साधनको असमान वितरण गर्ने तथा क्षेत्रीय विभेद बढाउने प्रवृत्तिको अन्त्यका लागि जनताले नै फैसला गर्नुपर्ने धारणा राखे।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
