सेतो खबर
काठमाडौं । प्रविधिको क्षेत्रमा द्रुत रूपमा अघि बढिरहेको भासिका एआई सामाजिक उत्तरदायित्वका काममा पनि सक्रिय रूपमा संलग्न देखिएको छ। भासिका एआईको आयोजनामा गृहेश्वरीस्थित चिया पथमा ३० जना विद्यार्थीलाई लक्षित गर्दै करियर काउन्सिलिङ तथा नेतृत्व विकाससम्बन्धी विस्तृत तालिम कार्यक्रम सम्पन्न भएको छ।
उक्त तालिम कार्यक्रमको उद्देश्य विद्यार्थीहरूलाई बदलिँदो समयअनुसार सही करियर छनोट गर्न सहयोग गर्नुका साथै नेतृत्व क्षमता, व्यक्तित्व विकास र व्यावहारिक सीप अभिवृद्धि गर्नु रहेको आयोजकले जनाएको छ। कार्यक्रममा सहभागी विद्यार्थीहरूलाई करियर योजना निर्माण, लक्ष्य निर्धारण, आत्मविश्वास विकास, निर्णय क्षमता र टिमवर्कजस्ता विषयमा व्यावहारिक प्रशिक्षण दिइएको थियो।
कार्यक्रममा प्रमुख अतिथिका रूपमा वरिष्ठ पत्रकार दिनेश सुवेदी उपस्थित थिए। उनले विद्यार्थीहरूलाई अनुशासन, निरन्तर सिकाइ र सामाजिक उत्तरदायित्वलाई आत्मसात् गर्दै अघि बढ्न सुझाव दिए। विशेष अतिथिका रूपमा सहभागी युवा उद्यमी अनुप बोहराले उद्यमशीलता, अवसरको पहिचान र युवाको भूमिकाबारे आफ्ना अनुभव साझा गर्दै विद्यार्थीहरूलाई प्रेरित गरेका थिए।
करियर काउन्सिलिङ सत्रमा भासिका एआईका निर्देशक उत्सव तिमल्सिनाले प्रविधि, आर्टिफिसियल इन्टेलिजेन्स र भविष्यका करियर सम्भावनाबारे जानकारी दिँदै विद्यार्थीहरूलाई आफूभित्रको क्षमता पहिचान गरी लक्ष्य स्पष्ट गर्न आग्रह गरे। यस्तै, प्रशिक्षक आशिष डाँगीले नेतृत्व विकास तालिम दिँदै नेतृत्व भनेको पद होइन, जिम्मेवारी र व्यवहार भएको स्पष्ट पारे। उनले आत्मविश्वास, प्रभावकारी सञ्चार र सहकार्य नै सफल नेतृत्वका आधार भएको बताए।
कार्यक्रमको अन्त्यमा तालिममा सहभागी सबै विद्यार्थीलाई प्रमाणपत्र वितरण गरिएको थियो। सहभागी विद्यार्थीहरूले तालिमबाट आफ्नो करियरप्रति स्पष्ट दृष्टिकोण बनेको र नेतृत्व क्षमतामा आत्मविश्वास बढेको प्रतिक्रिया दिएका छन्।
भासिका एआईले आगामी दिनमा पनि देशभरका विद्यार्थी तथा युवालाई लक्षित गर्दै करियर विकास, प्रविधि सचेतना र नेतृत्व अभिवृद्धिका यस्ता शैक्षिक तथा सामाजिक कार्यक्रमलाई निरन्तरता दिने प्रतिबद्धता जनाएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
