ओलीले अगुवाई गरेको सिंगो टिमलाई शानदार मतले विजयी बनाउन प्रदीप ज्ञवालीको अपिल

काठमाडौं, १ पुष । नेकपा (एमाले)का नेता तथा पूर्वमन्त्री प्रदीप ज्ञवालीले पार्टीको ११औँ महाधिवेशनमा अध्यक्ष केपी शर्मा ओलीको नेतृत्वमा रहेको सम्पूर्ण टिमलाई शानदार मतका साथ विजयी बनाउन अपिल गरेका छन्।

अध्यक्ष ओलीको टिमबाट उपाध्यक्षमा सिफारिस भए पनि ज्ञवालीले उक्त पदमा उम्मेदवारी नदिँदै अन्तिम समयमा विद्रोही निर्णय लिएका थिए। त्यसपछि उनले उपाध्यक्ष पद त्याग्दै केन्द्रीय सदस्यमा मात्रै उम्मेदवारी दर्ता गराएका छन्।

उपाध्यक्ष पदमा उम्मेदवारी नदिएपछि पार्टीभित्र विभिन्न अड्कलबाजी भइरहेका बेला, ज्ञवालीले आइतबार बिहान सार्वजनिक अपिल गर्दै ओली नेतृत्वको टिमलाई नै समर्थन जनाएका हुन्। उनले महाधिवेशनमा पार्टीको एकता, स्थायित्व र भविष्यका लागि ओली नेतृत्व आवश्यक रहेको उल्लेख गर्दै प्रतिनिधिहरूलाई एकताबद्ध भएर मतदान गर्न आग्रह गरेका छन्।

ज्ञवालीको यो अपिललाई महाधिवेशनको निर्णायक मोडमा पार्टीभित्र देखिएको अन्योल चिर्दै एकताको सन्देश दिन खोजिएको कदमका रूपमा हेरिएको छ।

उनले फेशबुकमा लेखेका छन्:

एघारौँ राष्ट्रिय महाधिवेशनका प्रिय प्रतिनिधि कमरेडहरू ! आज महाधिवेशनको सर्वाधिक महत्वपूर्ण र निर्णायक क्षण अर्थात् नयाँ नेतृत्वका लागि मतदान हुँदैछ । नेकपा (एमाले) को आन्तरिक जीवनका लागि मात्र होइन, चुनौतीपूर्ण राष्ट्रिय राजनीतिकै लागि पनि दूरगामी अर्थ राख्ने यस महाधिवेशनबाट कमरेड केपी शर्मा ओलीले अगुवाइ गर्नु भएको सिङ्गो टिमलाई शानदार मतका साथ विजयी बनाउनु हुन सबै कमरेडहरूमा हार्दिक अपिल गर्दछु । म हमेशा तपाईँहरूकै बिचमा छु, त्यहीँ रहन्छु ।

यसपटक पार्टी केन्द्रीय कमिटीको सदस्य पदमा उम्मेदवारी दिएको छु । कमरेडहरूबाट मन र मत दुबै पाउने विश्वास लिएको छु ।

धन्यवाद !

तपाईँहरूकै,

प्रदीप ज्ञवाली