सेतो खबर
कञ्चनपुर । सशस्त्र प्रहरी बल नेपालका नायब उपरीक्षक (डीएसपी) युकेश उप्रेतीले झापा जिल्लाको काँकडभिट्टादेखि कञ्चनपुरको गड्डाचौकीसम्म गरेको लामो दूरीको साइकल यात्रा सफलतापूर्वक सम्पन्न भएको छ। सीमा क्षेत्रको भौगोलिक अवस्थिति, सुरक्षा चुनौती र सीमावर्ती बासिन्दाका समस्या प्रत्यक्ष रूपमा बुझ्ने उद्देश्यसहित सुरु गरिएको यो यात्रा मंसिर २३ गते गड्डाचौकी पुगेर समाप्त भएको हो।
डीएसपी उप्रेतीले कार्तिक २४ गते झापाको मेचीनगर नगरपालिका–६ नयाँ पुलस्थित दशगजाबाट साइकल यात्रा सुरु गरेका थिए। उनले पूर्वदेखि पश्चिमसम्म नेपालको अन्तर्राष्ट्रिय सीमा क्षेत्र हुँदै करिब १ हजार ४ सय ४० किलोमिटर दूरी ३० दिनमा साइकलमार्फत पार गरेका हुन्। यस यात्रालाई सीमा सुरक्षा प्रणालीलाई जरोबाट बुझ्ने एक अभ्यासका रूपमा लिइएको छ।
६ प्रदेशका २१ सीमावर्ती जिल्लामा स्थलगत अध्ययन
साइकल यात्राका क्रममा डीएसपी उप्रेतीले ६ वटा प्रदेशअन्तर्गत २१ वटा सीमावर्ती जिल्लामा रहेका सशस्त्र प्रहरी बल नेपालका १ सय ८६ वटा बोर्डर आउट पोष्ट (बीओपी) मा पुगेर स्थलगत निरीक्षण तथा अवलोकन गरेका थिए। उनले बीओपीहरूको भौतिक संरचना, जनशक्ति अवस्था, उपकरण, दैनिक कार्यसम्पादन र सीमामा देखिएका समस्या बारे जानकारी लिँदै स्थानीय कमाण्डरसँग छलफल गरेका थिए।
यस क्रममा उनले सीमा अतिक्रमण, अवैध ओसारपसार, मानव तस्करी, सीमा स्तम्भको अवस्था, नदीजन्य समस्या तथा सीमावासीले भोग्दै आएका दैनिक कठिनाइबारे समेत प्रत्यक्ष रूपमा बुझ्ने प्रयास गरेका थिए।
स्थानीयसँग प्रत्यक्ष संवाद
यात्राका क्रममा डीएसपी उप्रेतीले सीमावासी, जनप्रतिनिधि, स्थानीय अगुवा, गैरसरकारी संघसंस्था तथा सुरक्षाकर्मीहरूसँग प्रत्यक्ष संवाद गर्दै उनीहरूका गुनासा र सुझाव संकलन गरेका थिए। सीमा क्षेत्रमा विकास, सुरक्षा र जनजीवनलाई सन्तुलनमा राख्न स्थानीय सहभागिताको भूमिका महत्वपूर्ण हुने उनले बताएका छन्।
गड्डाचौकीमा औपचारिक समापन
साइकल यात्राको समापन कञ्चनपुरको गड्डाचौकीमा औपचारिक रूपमा गरिएको थियो। समापन कार्यक्रममा कञ्चनपुर भन्सार कार्यालयका निमित्त प्रमुख चक्रदेव भट्ट, सशस्त्र प्रहरी बल नेपाल सीमा सुरक्षा गुल्म गड्डाचौकीका गुल्मपति सशस्त्र प्रहरी नायब उपरीक्षक जनकराज उपाध्याय, भारतीय समकक्षी सशस्त्र सीमा बल (एसएसबी) का पदाधिकारी, क्वारेन्टाइन तथा भन्सार कार्यालयका कर्मचारी, विभिन्न बीओपी प्रमुख, इलाका प्रहरी कार्यालय गड्डाचौकीका प्रमुख, जनस्वास्थ्यकर्मी, राजनीतिक दलका प्रतिनिधि, स्थानीय जनप्रतिनिधि, गैरसरकारी संघसंस्थाका प्रतिनिधि तथा स्थानीय सीमावासीहरूको उल्लेखनीय उपस्थिति रहेको थियो।
सीमा सुरक्षा सुधारमा योगदान
डीएसपी उप्रेतीले आफ्नो साइकल यात्राबाट प्राप्त अनुभव र तथ्यांकलाई प्रतिवेदनका रूपमा तयार गरी सम्बन्धित निकायमा पेस गर्ने बताएका छन्। यसले सीमा सुरक्षा मजबुत बनाउन, नीतिगत सुधार गर्न तथा सीमावासीका समस्या समाधानका लागि प्रभावकारी कदम चाल्न सहयोग पुग्ने विश्वास व्यक्त गरिएको छ।
उनको यो पहललाई सशस्त्र प्रहरी बलभित्र सीमा सुरक्षाप्रतिको प्रतिबद्धता, अनुशासन र नवीन सोचको उदाहरणका रूपमा हेरिएको छ।
युवराज गौतम / काठमाडौँ । मुलुकमा यतिबेला प्रतिनिधि सभा निर्वाचनको तयारी भइरहेको छ । आगामी फागुन २१ गतेका लागि तोकिएको निर्वाचनमा विदेशमा बस्ने नेपालीहरुलाई कसरी सहभागि... विस्तृतमा
