महेश बस्नेत बारा आउने भएपछि जेनजीले घेरे विमानस्थल, कालोमोसो दलेर बजार घुमाउने योजना, कफ्यू आदेश जारी

बारा । नेकपा एमालेका नेता महेश बस्नेत मधेस प्रदेशस्तरीय युवा जागरण अभियान कार्यक्रममा सहभागी हुन बारा आउने जानकारी सार्वजनिक भएपछि जेनजी युवाहरूले सिमरा विमानस्थल घेराउ गर्दै विरोध प्रदर्शन थालेका छन्। बस्नेतसहित एमालेका महासचिव शंकर पोखरेल र अन्य शीर्ष नेता बारा आउने कार्यतालिका बाहिर आएपछि जेनजी समूहले कडा आपत्ति जनाउँदै विरोध चर्काएको हो।

विमानस्थल बाहिर जेनजी समूहका युवाहरूले नाराबाजी र घेराबन्दी गर्दै प्रदर्शन जारी राखेका छन्। उनीहरूको तर्क अनुसार जेनजी आन्दोलनका क्रममा विमानस्थलमा भएको भनिएको ‘दमन’का घटना अझै ताजा रहेको अवस्थामा बस्नेतको आगमन ‘अस्वीकार्य’ छ।

यसैबीच, बस्नेतको स्वागतका लागि एमाले नेता किसान श्रेष्ठ, ज्वालाकुमारी साह, अच्युत मैनालीलगायतका स्थानीय तथा प्रदेशस्तरीय नेता विमानस्थल परिसरमा उपस्थित भएका छन्।

उडान प्रभावित
काठमाडौँबाट निर्धारित समयमा उडान भई धावनमार्गतर्फ बढेको बुद्ध एयरको जहाज पुनः पार्किङतिर फर्किएको छ। यात्रुलाई जहाजबाट झारेर “अर्को सूचना नआएसम्म उडान रोकिएको” बुद्ध एयरले जनाएको छ।

सुरक्षा चुनौती र कालोमोसो योजनाको सूचना
प्रहरी स्रोतका अनुसार जेनजी समूहले “एमाले नेताहरू विमानबाट ओर्लिनेबित्तिकै कालोमोसो दलेर बजार परिक्रमा गराउने योजना” बनाएको खुफिया जानकारी प्राप्त भएपछि सुरक्षा निकायले सावधानी अपनाउँदै नेताहरूलाई तत्काल नओर्लन सुझाव दिएको छ।

प्रदर्शन रोक्न खोज्दा झडप
विमानस्थल क्षेत्रमा प्रदर्शन रोक्न खोज्दा जेनजी समूह र प्रहरीबीच झडप भएको छ। प्रहरीले बल प्रयोग गरेपछि दुवै पक्षबीच धक्का–मुक्की र झडप भएको eyewitnessहरूले बताएका छन्। अहिले विमानस्थलमा जनपथ र सशस्त्र प्रहरीको ठूलो फोर्स परिचालन गरिएको छ, र परिस्थिति तनावपूर्ण बनेको छ।