दुर्गा प्रसाईंलाई ४ दिन हिरासतमा राख्न अदालतको अनुमति

काठमाडौं । सोमबार मध्यराति पक्राउ परेका मेडिकल व्यवसायी तथा राजावादी अभियन्ता दुर्गा प्रसाईंलाई प्रहरीले थप ४ दिन हिरासतमा राखेर अनुसन्धान अघि बढाउने भएको छ। सार्वजनिक शान्तिविरुद्धको कसुरमा दायर गरिएको मुद्दामा जिल्ला अदालत काठमाडौंले मंगलबार ४ दिनसम्म हिरासतमा राख्न अनुमति दिएको हो।

प्रसाईंले यही मंसिर ७ गतेदेखि देशव्यापी आन्दोलन गर्ने घोषणा गर्दै आएका थिए। आइतबार बसेको केन्द्रीय सुरक्षा समितिको बैठकले हिंसा भड्काउने र जनतालाई आतंकित पार्ने गतिविधिमा संलग्न व्यक्तिमाथि कडाइका साथ कानुनी कारबाही गर्ने निर्णय गरेको थियो। त्यसपछि काठमाडौं उपत्यका अपराध अनुसन्धान कार्यालय टेकु र जिल्ला प्रहरी परिसर काठमाडौंको संयुक्त टोलीले सोमबार राति उनलाई पक्राउ गरेको हो।

गत चैत १५ मा तीनकुनेमा प्रसाईं नेतृत्वित राजावादी आन्दोलनका क्रममा दुई जनाको ज्यान गएको थियो। प्रसाईंको गिरफ्तारीपछि उनका समर्थक तथा नागरिक बचाउ दलका कार्यकर्ताले प्रदर्शन गर्न सक्ने आकस्मिकतामा उपत्यकामा सुरक्षा व्यवस्था कडा पारिएको प्रहरीले जनाएको छ।