सेतो खबर
काठमाडौं । श्रीनगर एग्रिटेक इन्डस्ट्रीज लिमिटेडले आइतबार (असोज २६ गते)देखि सर्वसाधारणका लागि आइपिओ (IPO) बिक्री खुला गरेको छ। कम्पनीले सर्वसाधारण लगानीकर्ताका लागि २५ लाख १० हजार ४९३ कित्ता सेयर जारी गरेको हो।
यसअघि कम्पनीले वैदेशिक रोजगारीमा रहेका नेपाली र स्थानीय बासिन्दाका लागि सेयर जारी गरिसकेको छ। कुल ३२ लाख ६२ हजार कित्ता सेयरमध्ये बाँकी भाग सर्वसाधारणका लागि खुला गरिएको हो। कम्पनीले अंकित मूल्य प्रतिकित्ता रु. १०० का दरले सेयर बिक्री गर्न लागेको हो।
लगानीकर्ताले न्यूनतम १० कित्तादेखि अधिकतम १० हजार कित्तासम्म आवेदन दिन सक्नेछन्। कम्पनीको सेयरमा आवेदन दिने अन्तिम मिति छिटोमा असोज २९ गतेसम्म हुनेछ। सो अवधिभित्र सम्पूर्ण सेयर बिक्री नभएमा कात्तिक ९ गतेसम्म आवेदन दिन सकिनेछ।
श्रीनगर एग्रिटेकको आइपिओ निष्कासन तथा बिक्री प्रबन्धकमा नबिल इन्भेष्टमेन्ट बैंकिङ लिमिटेड रहेको छ। कम्पनीले इक्रा नेपालबाट ‘ICRA NP Issuer Rating BB (Double B)’ रेटिङ प्राप्त गरेको छ।
यसअघि ‘माइनस बी’ रेटिङ पाएको कम्पनीको क्रेडिट रेटिङमा सुधार आएको इक्राले जनाएको छ। तर, यो रेटिङले कम्पनीको वित्तीय दायित्व समयमा भुक्तानी गर्ने क्षमता अझै कमजोर रहेको संकेत गर्छ।
कम्पनीले पशुपन्छी र माछाका लागि दाना उत्पादन गर्दै आएको छ। कम्पनीका दुई प्रमुख उत्पादनहरू ‘सुनौलो’ र ‘हिमदाना’ रहेका छन्। रूपन्देहीस्थित उद्योगको वार्षिक दाना उत्पादन क्षमता १ लाख ३५ हजार मेट्रिक टन रहेको कम्पनीले जनाएको छ।
आर्थिक वर्ष २०८०/८१ मा कम्पनीको वार्षिक आम्दानी रु. १ अर्ब ९ करोड पुगेको छ। पछिल्लो समयमा कम्पनीले कुखुरापालन र मासु उत्पादन व्यवसायमा पनि लगानी विस्तार गरेको छ।
श्रीनगर एग्रिटेक इन्डस्ट्रीजमा सतीशचन्द्र श्रेष्ठको ३४ प्रतिशत, चन्द्र पंकज डेभलपर्सको १२ प्रतिशत, शिखर इन्सुरेन्सको ८ प्रतिशत, र सिटिजन्स लाइफ इन्सुरेन्सको ४ प्रतिशत सेयर स्वामित्व रहेको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
