दक्षिण कोरियाली उद्धार टोली खोज तथा उद्धारमा, ५ कुकुरसहित थप ४४ जनाको दक्ष टोली पठाउँदै

रसुवा । भोटेकोशी बाढीबाट प्रभावित क्षेत्रमा खोज तथा उद्धारका लागि दक्षिण कोरियाबाट आएको विशेषज्ञ टोली रसुवाको धुञ्चे पुगेको छ।

बाढी प्रभावित क्षेत्रमा हराइरहेका व्यक्तिको खोज तथा उद्धारमा सहयोग पुर्‍याउने उद्देश्यले नेपाल आएको टोली आवश्यक उपकरणको अभावका कारण यसअघि फिल्डमा खटिन नसकी धुञ्चे फर्किएको थियो। आवश्यक सामग्री उपलब्ध भएपछि टोली आजदेखि पुनः प्रभावित क्षेत्रमा खटिने जनाइएको छ।

टोलीले भोटेकोशी बाढीबाट प्रभावित विभिन्न क्षेत्रमा पुगेर हराइरहेका व्यक्तिको खोजी तथा उद्धार कार्यमा नेपाली सुरक्षा निकायसँग समन्वय गर्नेछ।

यसैबीच, रसुवाको भोटेकोशी क्षेत्रमा गएको विनाशकारी बाढीपछि खोज तथा उद्धार कार्यमा सहयोग गर्न दक्षिण कोरियाले ४४ सदस्यीय विशेषज्ञ टोली नेपाल पठाउने भएको छ। नेपाल सरकारको अनुरोधपछि दक्षिण कोरियाले कोरिया डिजास्टर रिलिफ टिम (KDRT) नेपाल पठाउन लागेको हो।

दक्षिण कोरियाको विदेश मन्त्रालयका अनुसार टोलीमा विदेश मन्त्रालय, कोरिया इन्टरनेसनल कोअपरेसन एजेन्सी (KOICA), अग्नि नियन्त्रण तथा अन्य सम्बन्धित निकायका ४४ जना विशेषज्ञ रहनेछन्। टोलीले बाढी तथा पहिरो प्रभावित क्षेत्रमा खोज, उद्धार तथा राहतसम्बन्धी काममा नेपाली अधिकारीसँग समन्वय गर्नेछ।

टोली दक्षिण कोरियाली वायुसेनाको KC-330 ‘साइग्नस’ बहुउद्देश्यीय हवाई यातायात तथा इन्धन भर्ने विमान मार्फत नेपाल आउने कार्यक्रम छ। टोलीसँग ७०० वटा विभिन्न उद्धार उपकरण र पाँच वटा खोज तथा उद्धारका लागि तालिमप्राप्त कुकुर समेत ल्याइनेछ।

उद्धार टोलीले बाढी तथा पहिरोमा पुरिएका र सम्पर्कविहीन भएका व्यक्तिको खोजीका लागि उच्च प्रविधिका उपकरण प्रयोग गर्नेछ। टोलीसँग उच्च क्षमताका ड्रोन, भग्नावशेष तथा माटोभित्र रहेका मानिस पत्ता लगाउने ध्वनि तथा भिडियो उपकरण, थर्मल इमेजिङ उपकरण, पानी निकाल्ने पम्प, खोजीका लागि प्रयोग हुने प्रोबिङ रड, तीव्र बहावमा उद्धार गर्ने सामग्री तथा रुख र ढुंगा हटाउने उपकरणसमेत रहनेछन्।

दक्षिण कोरियाली टोली करिब १० दिन नेपालमा रहनेछ। आवश्यकताअनुसार यसको अवधि थप गर्न सकिने दक्षिण कोरियाली विदेश मन्त्रालयले जनाएको छ। टोलीले नेपाल आएपछि नेपाली सरकार तथा यसअघि नेपालमा परिचालित दक्षिण कोरियाली द्रुत प्रतिक्रिया टोलीसँग समन्वय गरेर प्रभावित क्षेत्रमा खोज तथा उद्धार अभियान सञ्चालन गर्नेछ।

नौ जना दक्षिण कोरियाली नागरिकको खोजी प्राथमिकतामा

भोटेकोशी बाढीपछि रसुवास्थित माथिल्लो त्रिशूली–१ जलविद्युत् आयोजनामा कार्यरत नौ जना दक्षिण कोरियाली नागरिक सम्पर्कविहीन छन्। उनीहरूको खोजीका लागि दक्षिण कोरियाले यसअघि नै सरकारी द्रुत प्रतिक्रिया टोली नेपाल पठाइसकेको थियो।

भदौ १ गते उक्त टोलीले नेपाली सेनासँग समन्वय गरी रसुवामा संयुक्त खोजीसमेत गरेको छ। टोलीले स्थल तथा हवाई माध्यमबाट खोजी गरे पनि हालसम्म सम्पर्कविहीन नौ जनाको अवस्थाबारे महत्वपूर्ण जानकारी प्राप्त हुन सकेको छैन।

दक्षिण कोरियाली द्रुत प्रतिक्रिया टोलीले यसअघि हेलिकोप्टर र ड्रोन प्रयोग गरेर माथिल्लो त्रिशूली–१ जलविद्युत् आयोजनाको बाँध, पावरहाउस तथा क्याम्प क्षेत्रको हवाई र स्थलगत निरीक्षण गरेको थियो।

 नेपाली सेनासँग संयुक्त खोजी

दक्षिण कोरियाको नयाँ KDRT ले नेपालमा रहेको द्रुत प्रतिक्रिया टोलीसँग समन्वय गर्दै विशेषगरी दक्षिण कोरियाली नागरिक हराइरहेको अनुमान गरिएको क्षेत्रलाई प्राथमिकतामा राख्नेछ। त्यसपछि आवश्यकता र स्थानीय अवस्थाअनुसार अन्य बाढी प्रभावित क्षेत्रमा समेत खोज तथा उद्धार विस्तार गरिनेछ।

दक्षिण कोरियाली विदेश मन्त्रालयका अनुसार नेपाल सरकारले विदेशी विशेषज्ञ टोलीको सहयोग मागेपछि KDRT पठाउने प्रक्रिया अघि बढाइएको हो। यसअघि नेपालले आफ्नो सुरक्षा निकायमार्फत उद्धार तथा खोजीलाई प्राथमिकता दिँदै आएको थियो।

बाढीबाट रसुवा, नुवाकोट, धादिङलगायतका क्षेत्रमा ठूलो क्षति पुगेको छ। जलविद्युत् आयोजनाका सुरुङ तथा निर्माणस्थलमा समेत ठूलो मात्रामा माटो, ढुंगा र पानी पसेपछि खोज तथा उद्धार कार्य थप चुनौतीपूर्ण बनेको छ। पछिल्लो विवरणअनुसार विभिन्न जलविद्युत् आयोजनामा सयौं कामदार सम्पर्कविहीन रहेको र केही सुरुङभित्र फसेको आशंका गरिएको छ।