शशांक भन्छन्- देउवा स्वदेश फर्किँदा धरपकड भए विरोध गर्छौँ

काठमाडौं– नेपाली कांग्रेसको संस्थापनइतर समूहले आयोजना गर्न लागेको राष्ट्रिय भेलालाई निवर्तमान सभापति शेरबहादुर देउवाले सम्बोधन गर्ने भएको छ।

संस्थापनइतर समूहले शुक्रबार काठमाडौंमा पत्रकार सम्मेलन गर्दै यही साउन २९ देखि ३१ गतेसम्म काठमाडौंमा आयोजना हुने राष्ट्रिय भेलालाई देउवाले सम्बोधन गर्ने तय भएको जानकारी दिएको हो। राष्ट्रिय भेला आयोजक समितिका संयोजक डा. शशांक कोइरालाले देउवा साउन २६ गते स्वदेश फर्कने जानकारी दिए।

कोइरालाका अनुसार भेलाले मुलुकको वर्तमान राजनीतिक परिस्थितिबारे छलफल गर्दै पार्टीको सम्पूर्ण एकता, सहमति र सहकार्यसहितको भावी कार्यदिशा तय गर्नेछ।

उनले देउवा स्वदेश फर्कने क्रममा राज्यका तर्फबाट धरपकड वा पक्राउ गर्ने प्रयास भए त्यसको विरोध गर्ने चेतावनीसमेत दिए।

राष्ट्रियता, लोकतन्त्र र समाजवादका मूलभूत सिद्धान्तमा आधारित भएर पार्टीलाई नयाँ कार्यदिशासहित नयाँ जीवन दिने उद्देश्यले राष्ट्रिय भेला आयोजना गर्न लागिएको कोइरालाले बताए।

यस्तै, कांग्रेस केन्द्रीय समितिको आधिकारिकतासम्बन्धी मुद्दामा पुनरावलोकनको अनुमति प्राप्त भएकाले सर्वोच्च अदालतबाट हुने पुनरावलोकनपछि न्याय प्राप्त हुनेमा आफू विश्वस्त रहेको उनले बताए।