सेतो खबर
काठमाडौं । एक सातादेखि आमरण अनशनमा रहेकी नर्स अभियन्ता ज्योति रानाभाट र सरकारबीच १९ बुँदे सहमति भएको छ। सहमतिसँगै रानाभाटले बिहीबारदेखि जारी आमरण अनशन तथा विरोधका सम्पूर्ण कार्यक्रम बुधबार बिहानदेखि अन्त्य गरेकी छन्।
स्वास्थ्य तथा जनसंख्या मन्त्रालयमा भएको वार्तापछि स्वास्थ्य मन्त्रालयका अतिरिक्त सचिव डा. श्रीकृष्ण श्रेष्ठ, वरिष्ठ मेडिकल सुपरिटेन्डेन्ट डा. हेमन्त चन्द्र ओझा, कानुन अधिकृत जयप्रसाद सुवेदी तथा नर्स अभियन्ता ज्योति रानाभाटबीच सहमतिपत्रमा हस्ताक्षर भएको हो।
सहमतिअनुसार सरकारी, निजी तथा सामुदायिक अस्पतालमा कार्यरत नर्स, मिडवाइफ तथा अन्य स्वास्थ्यकर्मीको पारिश्रमिक, सेवा–सुविधा र सम्मानजनक सेवा शर्त निर्धारण गर्न सात दिनभित्र कार्यदल गठन गरिनेछ। उक्त कार्यदलले छ महिनाभित्र आफ्नो प्रतिवेदन तयार गरी आवश्यक सुझाव सरकारलाई बुझाउने सहमति भएको छ।
त्यस्तै, नर्स तथा मिडवाइफको पेशागत अधिकार, सेवा–सुविधा र कार्य वातावरण सुधारका लागि स्वास्थ्य सेवा ऐन, नर्सिङ तथा मिडवाइफ्री सेवा ऐन तथा सम्बन्धित नियमावली आवश्यकताअनुसार संशोधन गरी प्रभावकारी कार्यान्वयन गर्ने विषयमा पनि सरकार सहमत भएको छ।
सहमतिमा देशभरका अस्पतालमा न्यूनतम सेवा मापदण्ड अनिवार्य रूपमा लागू गर्ने, छात्रवृत्ति प्राप्त स्वास्थ्यकर्मी परिचालन निर्देशिकामा आवश्यक परिमार्जन गर्ने, ‘एक स्वास्थ्यकर्मी–एक स्वास्थ्य संस्था’ सम्बन्धी मापदण्ड पुनरावलोकन गर्ने तथा स्वास्थ्य क्षेत्रको प्रवेश परीक्षा नीतिमा सुधार गर्ने विषय पनि समेटिएको छ।
यसका साथै स्वास्थ्यकर्मीको पेशागत सुरक्षा, सेवा शर्त, कार्यस्थलको वातावरण तथा स्वास्थ्य सेवाको गुणस्तर सुधारसँग सम्बन्धित अन्य विभिन्न विषय गरी कुल १९ बुँदामा सरकार र रानाभाट पक्षबीच सहमति भएको जनाइएको छ।
गत साउन १४ गतेदेखि आमरण अनशनमा बसेकी रानाभाटले नर्स तथा स्वास्थ्यकर्मीको न्यूनतम पारिश्रमिक, श्रम अधिकार, सेवा–सुविधा र सम्मानजनक कार्य वातावरण सुनिश्चित गर्नुपर्ने माग राख्दै आन्दोलन सुरु गरेकी थिइन्। सरकारसँग भएको सहमतिपछि उनले आफ्नो आन्दोलनका सबै कार्यक्रम तत्कालका लागि स्थगित गरेको जनाएकी छन्।
सरकारले सहमतिका बुँदाहरू समयमै कार्यान्वयन गर्ने प्रतिबद्धता जनाएको छ भने नर्सिङ क्षेत्रका सरोकारवालाले पनि सहमतिलाई व्यवहारमा कार्यान्वयन गर्न सरकार गम्भीर बन्नुपर्ने बताएका छन्।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
