कांग्रेस सांसद अभिषेकप्रताप शाहविरूद्व पक्राउ पुर्जी जारी

रूपन्देही । नेपाली कांग्रेसका सांसद अभिषेकप्रताप शाहविरुद्ध पक्राउ पुर्जी जारी भएको छ। कृष्णनगर उद्योग वाणिज्य संघका अध्यक्ष सीताराम शर्मामाथि आक्रमण गरेको आरोपमा उनीविरुद्ध मुद्दा दर्ता भएपछि कपिलवस्तु जिल्ला अदालतबाट पक्राउ पुर्जी जारी गरिएको प्रहरीले जनाएको छ।

कपिलवस्तु प्रहरीका सूचना अधिकारी प्रहरी नायब उपरीक्षक (डीएसपी) रिपेन्द्रकुमार सिंहका अनुसार घटनासम्बन्धी उजुरी दर्ता भएपछि आवश्यक अनुसन्धानका लागि सांसद शाहविरुद्ध पक्राउ पुर्जी जारी गरिएको हो। शाह कपिलवस्तु निर्वाचन क्षेत्र नम्बर–३ बाट निर्वाचित प्रतिनिधिसभा सदस्य हुन्।

घटना केही दिनअघि कृष्णनगर क्षेत्रमा भएको बताइएको छ। आरोपअनुसार संघीय सांसद अभिषेकप्रताप शाह, कृष्णनगर नगरपालिकाका नगरप्रमुख रजतप्रताप शाहसहित १५ देखि २० जनाको समूह अध्यक्ष शर्माको निवासमा प्रवेश गरी उनीमाथि कुटपिट गरेको थियो।

घटनापछि सार्वजनिक भएको भिडियोमा ठूलो समूह घरभित्र प्रवेश गरेर अध्यक्ष शर्मामाथि हातपात गरेको दृश्य देखिएको छ। उक्त भिडियो सामाजिक सञ्जालमा व्यापक रूपमा फैलिएको थियो, त्यसपछि घटनाबारे अनुसन्धान तीव्र पारिएको प्रहरीले जनाएको छ।

पीडित पक्षले आफूलाई योजनाबद्ध रूपमा आक्रमण गरिएको दाबी गर्दै कानुनी कारबाहीको माग गरेको छ। घटनामा संलग्न अन्य व्यक्तिहरूको भूमिकाबारे पनि प्रहरीले अनुसन्धान गरिरहेको जनाएको छ।

प्रहरीका अनुसार पक्राउ पुर्जी जारी भइसकेकाले सांसद शाहलाई कानुनी प्रक्रियाअनुसार उपस्थित गराउने तथा आवश्यक परे पक्राउ गरी अनुसन्धान अघि बढाइनेछ। साथै घटनामा संलग्न भनिएका अन्य व्यक्तिको संलग्नता र घटनाको वास्तविकता खुलाउन प्रमाण संकलन तथा बयान लिने काम जारी रहेको प्रहरीले जनाएको छ।

यस घटनाले कपिलवस्तुको राजनीतिक वृत्तमा तरंग सिर्जना गरेको छ भने सांसदमाथि पक्राउ पुर्जी जारी भएपछि यस विषयले थप चर्चा पाएको छ। अब अनुसन्धानको निष्कर्ष र अदालतको प्रक्रियाले घटनाको कानुनी टुंगो लगाउनेछ।