सेतो खबर
काठमाडौं ।सामाजिक सञ्जालमार्फत प्रधानमन्त्री बालेन्द्र शाह (बालेन) र उनको परिवारलाई लक्षित गरी अपमानजनक, अमर्यादित तथा अश्लील प्रकृतिका सामग्री प्रसारण गरेको आरोपमा पक्राउ परेका पाँचथरका युट्युबर रोशन पोखरेललाई पुर्पक्षका लागि थुनामा पठाउने आदेश भएको छ।
पाँचथर जिल्ला अदालतले प्रारम्भिक प्रमाण तथा अनुसन्धानबाट संकलित आधारहरूलाई विचार गर्दै पोखरेललाई मुद्दाको अन्तिम किनारा नलागेसम्म पुर्पक्षका लागि थुनामा राख्न आदेश दिएको जिल्ला प्रहरी कार्यालय पाँचथरले जनाएको छ। अदालतको आदेशसँगै उनलाई कारागार चलान गरिएको प्रहरीले पुष्टि गरेको छ।
प्रहरीका अनुसार पोखरेलले फेसबुक, टिकटक, इन्स्टाग्रामलगायत विभिन्न सामाजिक सञ्जालमार्फत प्रधानमन्त्री शाह र उनको परिवारलाई लक्षित गर्दै गालीगलौज, मानमर्दन हुने अभिव्यक्ति तथा अश्लील प्रकृतिका सामग्री सार्वजनिक गरेका थिए। ती सामग्री व्यापक रूपमा सामाजिक सञ्जालमा फैलिएको र सार्वजनिक पदमा रहेका व्यक्तिको प्रतिष्ठामा आँच पुग्ने प्रकृतिको रहेको भन्दै उजुरी परेपछि अनुसन्धान अघि बढाइएको थियो।
सोही आरोपमा प्रहरीले उनलाई गत चैत २६ गते पक्राउ गरी विद्युतीय कारोबार ऐनअन्तर्गत साइबर अपराध सम्बन्धी कसुरमा अनुसन्धान सुरु गरेको थियो। अनुसन्धानका क्रममा सामाजिक सञ्जालमा पोस्ट गरिएका सामग्री, डिजिटल प्रमाण तथा अन्य आवश्यक तथ्यहरू संकलन गरिएको प्रहरीले जनाएको छ।
अनुसन्धान सम्पन्न भएपछि जिल्ला सरकारी वकिल कार्यालयमार्फत केही दिनअघि पाँचथर जिल्ला अदालतमा उनीविरुद्ध अभियोगपत्र दर्ता गरिएको थियो। त्यसपछि भएको थुनछेक बहसमा दुवै पक्षका कानुन व्यवसायीले आ–आफ्नो तर्क प्रस्तुत गरेका थिए।
अदालतले अभियोगपत्र, अनुसन्धानबाट प्राप्त प्रमाण तथा अभियुक्त फरार हुन सक्ने वा प्रमाणमा असर पार्न सक्ने सम्भावनासमेतलाई आधार मान्दै मुद्दाको अन्तिम फैसला नआउञ्जेलसम्म पुर्पक्षका लागि थुनामा राख्ने आदेश दिएको हो।
अब पोखरेलविरुद्ध दायर गरिएको साइबर अपराधसम्बन्धी मुद्दाको नियमित सुनुवाइ अदालतमा हुनेछ। अदालतबाट अन्तिम फैसला नभएसम्म उनीमाथि लागेको आरोप कानुनी रूपमा पुष्टि भएको मानिँदैन।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
