वन कर्मचारीले टेम्पो भीरबाट खसालेपछि आलोचना, पीडितको गुनासो– ‘हारगुहार गर्दा पनि कसैले सुनेन’

धनगढी । कैलालीको गोदावरी नगरपालिका क्षेत्रमा डिभिजन वन कार्यालयका कर्मचारीले एक महिलाको टेम्पो भीरबाट धकेलेर खसालेको घटना सार्वजनिक भएपछि चौतर्फी आलोचना भएको छ। घटनाको भिडियो सामाजिक सञ्जालमा भाइरल भएसँगै वन कर्मचारीहरूको कार्यशैलीमाथि प्रश्न उठेको हो।

शनिबार भएको उक्त घटनामा गोदावरी नगरपालिका–४ बासपानीकी ४४ वर्षीया धनादेवी धामीको टेम्पो भीरबाट खसालिएको थियो। धामीले भीमदत्त राजमार्गअन्तर्गत गाइमारे डाँडास्थित सडक किनारमा टेम्पोमार्फत दैनिक उपभोग्य सामान बिक्री गर्दै आएकी थिइन्।

डिभिजन वन कार्यालय धनगढीका कर्मचारीहरूले उक्त स्थान वन क्षेत्र अतिक्रमण गरी व्यापार सञ्चालन गरिएको दाबी गर्दै कारबाही गरेका हुन्। प्रत्यक्षदर्शीका अनुसार कर्मचारीहरूले पहिले टेम्पोभित्र रहेका सामान झारेका थिए भने त्यसपछि गाडीलाई धकेलेर भीरबाट खसालेका थिए।

पीडित धामीले आफूले टेम्पो घर लैजान र भविष्यमा उक्त स्थानमा व्यापार नगर्ने प्रतिबद्धता व्यक्त गरे पनि कर्मचारीहरूले कुनै सुनुवाइ नगरेको बताएकी छन्।

“अबदेखि यहाँ सामान बेच्न आउँदिनँ, टेम्पो घर लैजान दिनुस् भनेर धेरै अनुरोध गरेँ,” धामीले भनिन्, “तर कसैले मेरो कुरा सुनेन। अन्ततः टेम्पो भीरबाट खसालियो।”

घटनाको भिडियो सार्वजनिक भएपछि सामाजिक सञ्जालमा सरकारी कर्मचारीहरूको व्यवहारप्रति तीव्र असन्तुष्टि व्यक्त भइरहेको छ। धेरैले वन अतिक्रमण नियन्त्रण आवश्यक भए पनि कानुनी प्रक्रिया र मानवीय संवेदनालाई बेवास्ता गरेर गरिएको यस्तो कार्य स्वीकार्य नहुने बताएका छन्।

घटनास्थलमा उपस्थित व्यक्तिहरूले भिडियो खिचिरहेको देखिए पनि कसैले हस्तक्षेप नगरेको भन्दै पनि चर्चा भइरहेको छ। भिडियोमा केही कर्मचारीहरूले मिलेर टेम्पोलाई भीरतर्फ धकेलेको दृश्य देखिन्छ।

घटनापछि वन कार्यालयको भूमिकामाथि छानबिन गर्न र पीडितलाई उचित क्षतिपूर्ति उपलब्ध गराउन माग उठ्न थालेको छ। यस विषयमा डिभिजन वन कार्यालय धनगढीले औपचारिक प्रतिक्रिया सार्वजनिक गरिसकेको छैन।

सामाजिक सञ्जालमा बढ्दो आलोचनासँगै घटनाको सत्यतथ्य छानबिन गरी जिम्मेवारमाथि आवश्यक कारबाही गर्नुपर्ने आवाज बलियो बन्दै गएको छ।