सेतो खबर
काठमाडौं । भारतको तमिलनाडु राज्यमा सरकार गठनको प्रक्रिया रोचक मोडमा पुगेको छ । भारतीय राष्ट्रिय कांग्रेसले तमिलगा वेत्री कझगम (टिभिके) र यसको नेतृत्व गरिरहेका विजयलाई सरकार गठनका लागि औपचारिक रूपमा पूर्ण समर्थन घोषणा गरेको छ ।
तमिलनाडु कांग्रेसका प्रभारी गिरीश चोडानकरद्वारा हस्ताक्षरित पत्रमा जनताले टिभिकेलाई “स्पष्ट, बलियो र व्यापक” जनादेश दिएको उल्लेख गरिएको छ । सोही आधारमा तमिलनाडु कांग्रेस समिति र कांग्रेस विधानमण्डल दलले टिभिके नेतृत्वमा सरकार गठनका लागि समर्थन दिने निर्णय गरेको जनाएको छ ।
यद्यपि कांग्रेसले आफ्नो समर्थन सशर्त रहने स्पष्ट पारेको छ । पार्टीले संविधानमा विश्वास नगर्ने “साम्प्रदायिक शक्तिहरू” लाई गठबन्धनबाट बाहिर राख्नुपर्ने सर्त अघि सारेको छ । कांग्रेसले यो गठबन्धनले पेरुनथलाइभर कामराजको विकासको युग फर्काउने, पेरियारको सामाजिक न्याय र डा. भीमराव अम्बेडकरका संवैधानिक आदर्शहरूलाई अघि बढाउने लक्ष्य राखेको उल्लेख गरेको छ ।
कांग्रेसले टिभिके सँगको सहकार्य केवल सरकार गठनमा सीमित नभई आगामी स्थानीय तह, लोकसभा र राज्यसभाका चुनावसम्म विस्तार हुने पनि जनाएको छ । पहिलो पटक निर्वाचनमा सहभागी भएको टिभिकेले २३४ सदस्यीय विधानसभा मध्ये १०८ सिट जित्दै उल्लेखनीय प्रदर्शन गरेको छ, जुन बहुमतका लागि आवश्यक ११८ सिटभन्दा १० सिट कम हो । सरकार गठनका लागि टिभिकेले कांग्रेस र वामपन्थी दलहरूसँग गठबन्धन गर्ने सम्भावना देखिएको छ ।
यसैबीच, तमिलनाडुका राज्यपाल राजेन्द्र विश्वनाथ आर्लेकरले टिभिके प्रमुख विजयसँग सरकार गठनबारे छलफल गर्न भेट्ने तयारी भएको बताएका छन्
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
