सेतो खबर
काठमाडौं । नेशनल लाइफ इन्स्योरेन्स कम्पनी लिमिटेडको ३८औँ वार्षिक साधारण सभा मिति २०८२/०९/३० गते कम्पनीकी अध्यक्ष प्रेमा सिंहको अध्यक्षतामा सम्पन्न भएको छ ।
सभामा अध्यक्ष सिंहले आर्थिक वर्ष २०८१/८२ मा विश्व अर्थतन्त्र चुनौतीबीच पनि लचिलो रहेको र मुद्रास्फीति घट्दो क्रममा रहेकाले केन्द्रीय बैंकहरूले लचिलो मौद्रिक नीति अपनाएको बताइन् । उनले राष्ट्रिय तथ्यांक कार्यालयको अनुमानअनुसार उक्त वर्ष नेपालको आर्थिक वृद्धि दर ४.६१ प्रतिशत रहने उल्लेख गरिन् ।
समीक्षा वर्षमा कम्पनीको व्यवसाय सन्तोषजनक रहेको जनाउँदै अध्यक्ष सिंहले कूल बीमाशुल्क १०.२६ प्रतिशतले वृद्धि भई २ खर्ब २५ अर्ब ९९ करोड रुपैयाँ पुगेको जानकारी दिइन् । कूल बीमा करार दायित्व १८.८३ प्रतिशतले बढेर ९ खर्ब ४५ अर्ब ८८ करोड रुपैयाँ पुगेको छ भने सो अवधिमा ९४ अर्ब ८६ करोड रुपैयाँ बराबरको दाबी भुक्तानी गरिएको छ ।
लगानीतर्फ कम्पनीको कूल लगानी ११.०४ प्रतिशतले वृद्धि भई ७ खर्ब ७९ अर्ब २० करोड रुपैयाँ पुगेको छ । औसत वार्षिक लगानी प्रतिफल दर ८.७६ प्रतिशत रहेको छ । लगानी विविधिकरणको क्रममा कम्पनीले हिमालयन बैंक लिमिटेडको १३.६१ प्रतिशत सेयर स्वामित्व प्राप्त गरेको जनाएको छ ।
सभाले आर्थिक वर्ष २०८१/८२ का लागि ८.५ प्रतिशत नगद लाभांश र ४ प्रतिशत बोनस सेयर वितरण गर्ने प्रस्ताव पारित गरेको छ । बोनस सेयरपछि कम्पनीको चुक्ता पूँजी ५ अर्ब ६९ करोड रुपैयाँ पुगेको छ ।
संस्थागत सामाजिक उत्तरदायित्व अन्तर्गत कम्पनीले प्रधानमन्त्री दैवी प्रकोप राहत कोषसहित स्वास्थ्य तथा शिक्षा क्षेत्रमा सहयोग गर्दै आएको जनाएको छ । सभाको अन्त्यमा अध्यक्ष सिंहले नेशनल लाइफ इन्स्योरेन्सले आगामी दिनमा पनि जीवन बीमा क्षेत्रमा अग्रणी भूमिका निर्वाह गर्ने विश्वास व्यक्त गरिन् ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
