कतारलाई उपहार स्वरुप दिन लागीएको खगेन्द्र र रुद्रकलीलाई सौराहाबाट बिदाई

चितवन । नेपाल सरकारले कूटनीतिक उपहारका रूपमा कतारलाई प्रदान गर्न लागेको दुईवटा हात्तीलाई सोमबार चितवनको सौराहाबाट औपचारिक रूपमा बिदाइ गरिएको छ।

चितवन राष्ट्रिय निकुञ्जअन्तर्गत सौराहास्थित हात्ती प्रजनन तथा तालिम केन्द्र खोरसोरमा जन्मिएका खगेन्द्रप्रसाद र रुद्रकली नामका दुई छावालाई खोरसोरबाट ट्रकमार्फत् सोमबार बिदाइ गरिएको हो। ती हात्तीलाई आगामी पुस २ गते रुपन्देहीको भैरहवा विमानस्थलबाट विशेष कार्गो उडानमार्फत् कतार पठाउने तयारी गरिएको निकुञ्जले जनाएको छ।

कतार सरकारलाई उपहारस्वरूप प्रदान गरिने यी हात्ती नेपाल–कतारबीचको मैत्रीपूर्ण सम्बन्ध, आपसी सहयोग र कूटनीतिक सद्भावको प्रतीकका रूपमा पठाउन लागिएको हो। यसअघि पनि नेपालले विभिन्न मित्र राष्ट्रलाई वन्यजन्तु उपहार दिने परम्परा कायम गर्दै आएको छ।

हात्ती बिदाइको अवसरमा सौराहामा विशेष कार्यक्रमको आयोजना गरिएको थियो। कार्यक्रममा रत्ननगर नगरपालिका प्रमुख प्रल्लाहद सापकोटा, चितवनका प्रमुख जिल्ला अधिकारी गणेश अर्याल, चितवन राष्ट्रिय निकुञ्जका प्रमुख संरक्षण अधिकृत डा. गणेश पन्तलगायत निकुञ्ज, स्थानीय प्रशासन, सुरक्षानिकाय तथा सरोकारवाला निकायका पदाधिकारीहरूको उपस्थिति रहेको थियो।

कार्यक्रममा बोल्दै वक्ताहरूले हात्ती नेपालको प्राकृतिक सम्पदा र सांस्कृतिक पहिचानको महत्वपूर्ण प्रतीक भएको उल्लेख गर्दै कतारलाई दिइने यो उपहारले दुई देशबीचको सम्बन्ध अझ सुदृढ बनाउने विश्वास व्यक्त गरे।

निकुञ्ज प्रशासनका अनुसार हात्तीको स्वास्थ्य परीक्षण, खानपान व्यवस्थापन, ढुवानीका क्रममा आवश्यक सुरक्षा र अन्तर्राष्ट्रिय मापदण्डअनुसारको व्यवस्थापन पूरा गरिएको छ। लामो दूरीको यात्रा सहज र सुरक्षित बनाउन पशु चिकित्सकसहितको टोली खटाइने जनाइएको छ।

चितवन राष्ट्रिय निकुञ्जले हात्ती प्रजनन, संरक्षण र तालिममा उल्लेखनीय सफलता हासिल गर्दै आएको छ। सोही केन्द्रमा जन्मिएका खगेन्द्रप्रसाद र रुद्रकलीलाई उपहारस्वरूप पठाउन लागिएको विषयलाई निकुञ्जको संरक्षण प्रयासको सकारात्मक उपलब्धिका रूपमा लिइएको छ।