बाला चतुर्दशीमा पशुपति क्षेत्रमा शतबीज छरियो, पितृले मोक्ष पाउने जनविश्वास

काठमाडौं । मार्गशीर्ष कृष्ण चतुर्दशीका अवसरमा आज पितृमोक्षको कामनासहित पशुपति क्षेत्रको मृगस्थलीमा श्रद्धालुहरूले शतबीज छरेका छन्। बाला चतुर्दशीका नामले पनि परिचित यो दिन दिवंगत पितृको सद्गतिको कामना गर्दै शतबीज छर्ने धार्मिक परम्परा रहेको छ।

‘चर्तुवर्ग–चिन्तामणि’ अनुसार शतबीजमा धानका सय दाना समावेश हुने मानिन्छ। तर वर्तमान अभ्यासमा श्रद्धालुहरूले धानसँगै मकै, गहुँ, जौँ, कागुनो, हलेदो लगायतका अन्नसमेत शतबीजका रूपमा प्रयोग गर्ने गरेका छन्।

मार्गशीर्ष कृष्ण त्रयोदशीको राति महादीपदान गरी बिहान शतबीज छर्ने र त्यसपछि अन्न ग्रहण गर्ने परम्परा छ। धार्मिक विश्वासअनुसार यसरी छरिएको शतबीजले पितृलाई मोक्ष प्राप्त हुने मानिन्छ।

पशुपति क्षेत्रसँगै काठमाडौं उपत्यकाका अन्य शिवालय–गोकर्णेश्वर, डोलेश्वर, वसन्तपुरस्थित हनुमानढोका दरबार परिसरको मक्खन महादेवस्थानमा पनि आज शतबीज छर्ने धार्मिक क्रियाकलाप भएको छ।