सञ्चारमन्त्री खरेलको पहलमा काठमाडौंका यि १९ स्थानमा निःशुल्क वाइफाइ इन्टरनेट

काठमाडौं । अब काठमाडौं उपत्यकाका विभिन्न सार्वजनिक स्थलमा नागरिकले निःशुल्क इन्टरनेट प्रयोग गर्न सक्ने भएका छन्। सञ्चार तथा सूचना प्रविधिमन्त्री जगदीश खरेलको पहलमा राजधानीका १९ वटा सार्वजनिक स्थानमा निःशुल्क वाइफाइ सेवा सञ्चालनमा ल्याइएको हो।

मन्त्रालयका अनुसार, सेवा विस्तारका क्रममा काठमाडौं, ललितपुर र भक्तपुरका अस्पताल, मन्दिर, विमानस्थल, र सार्वजनिक सेवा प्रवाह हुने स्थानहरूमा वाइफाइ इन्टरनेट सेवा थप गरिएको छ। यसअघि नै सेवा उपलब्ध रहेका स्थानहरूमा मर्मतसम्भार, गुणस्तर सुधार र क्षमता वृद्धि गरिएको छ भने तीन निर्माणाधीनसहित आठ स्थानमा नयाँ जडान गरिएको हो।

यी स्थानमा नयाँ वाइफाइ सुविधा

नयाँ वाइफाइ सुविधा नयाँ बसपार्क, भक्तपुर अस्पताल, भक्तपुर क्यान्सर अस्पताल, कीर्तिपुर अस्पताल र त्रिभुवन अन्तर्राष्ट्रिय विमानस्थलमा उपलब्ध हुनेछ। साथै, काठमाडौंको ठूलोभर्‍याङ यातायात व्यवस्था कार्यालय, ललितपुरको एकान्तकुनास्थित यातायात व्यवस्था कार्यालयमा स्थापना कार्य भइरहेको छ भने भक्तपुरको राधेराधे यातायात व्यवस्था कार्यालयमा नयाँ जडानको तयारी भइरहेको मन्त्रालयले जनाएको छ।

नेपाल टेलिकम, वर्ल्डलिंक र भायनेटको सहकार्य

निःशुल्क वाइफाइको दिगोपनाका लागि सम्बन्धित संस्थाहरूले सेवाप्रदायक कम्पनीहरूसँग औपचारिक सम्झौता गरेका छन्। नेपाल टेलिकम, वर्ल्डलिंक र भायनेट कम्पनीहरूले संयुक्त रूपमा वाइफाइ इन्टरनेट स्थापनाको जिम्मेवारी लिएका छन्।

नेपाल दूरसञ्चार प्राधिकरणको समन्वयमा यस कार्यलाई अघि बढाइएको हो। प्राधिकरणका अनुसार, यसअघि सेवा उपलब्ध रहेका वीर अस्पताल, परोपकार प्रसुति गृह तथा स्त्री रोग अस्पताल, त्रिवि शिक्षण अस्पताल महाराजगञ्ज, टेकु अस्पताल, कान्ति बाल अस्पताल, सहिद गंगालाल हृदय केन्द्र, सिभिल अस्पताल, राष्ट्रिय ट्रमा सेन्टर, पाटन अस्पताल, सहिद धर्मभक्त माथेमा उपचार केन्द्र र पशुपति मन्दिर परिसरमा १० एमबीपीएस ब्यान्डविथलाई बढाएर १५० एमबीपीएस बनाइएको छ।

त्यस्तै, ती क्षेत्रमा प्रत्येक डिभाइसका लागि इन्टरनेट कोटा १०० एमबीबाट बढाएर ५०० एमबी बनाइएको छ। यसले प्रयोगकर्तालाई सहज, द्रुत र स्थिर इन्टरनेट अनुभव दिनेछ।

३५ विमानस्थलमा पनि निःशुल्क वाइफाइको तयारी

नेपाल टेलिकमले काठमाडौंस्थित त्रिभुवन अन्तर्राष्ट्रिय विमानस्थलसहित देशभरका ३५ वटा विमानस्थलमा निःशुल्क वाइफाइ सेवा विस्तार गर्ने योजना बनाएको छ। यो योजना आगामी वर्षभित्रै कार्यान्वयनमा ल्याइने तयारी गरिएको बताइन्छ।

भक्तपुर क्यान्सर अस्पतालमा ६ वटा एक्सेस प्वाइन्ट र कीर्तिपुर अस्पतालमा ५ वटा एक्सेस प्वाइन्ट स्थापना गरी नयाँ वाइफाइ सेवा सञ्चालनमा ल्याइएको छ।

मन्त्री खरेलको पहल र पहिलो निर्णयको कार्यान्वयन

गत असोज ६ गते सूचना तथा सञ्चार प्रविधिमन्त्रीका रूपमा पदभार ग्रहण गर्दै मन्त्री खरेलले आफ्नो पहिलो निर्णयमा “दुई महिनाभित्र काठमाडौं उपत्यकाका प्रमुख सार्वजनिक स्थलहरूमा निःशुल्क वाइफाइको पहुँच पुर्‍याउने” घोषणा गरेका थिए।

मन्त्री खरेलका अनुसार, “सूचना प्रवाहको सहज पहुँच नागरिकको अधिकार हो। निःशुल्क वाइफाइले सेवाग्राही, विद्यार्थी, र ती क्षेत्रमा आउने सर्वसाधारण सबैलाई लाभ पुर्‍याउनेछ।”

प्राविधिक सुधार र दिगो योजना

मन्त्रालयले सेवा निरन्तरता सुनिश्चित गर्नका लागि नेपाल दूरसञ्चार प्राधिकरणमार्फत अनुगमन र मर्मत व्यवस्थापन प्रणाली समेत लागू गर्न लागेको जनाएको छ। वाइफाइ प्रयोगको पारदर्शिता र सुरक्षाका लागि पनि विशेष प्रविधि प्रयोग गरिएको मन्त्रालयले जनाएको छ।

सञ्चारमन्त्री खरेलको नेतृत्वमा सुरु भएको यो अभियानले काठमाडौं उपत्यकाको डिजिटल पहुँच विस्तारमा नयाँ माइलस्टोन स्थापित गरेको विशेषज्ञहरूले टिप्पणी गरेका छन्।