मुख्यमन्त्रीले विश्वासको मत पाउनुहुन्छ, बाहिर आएका कुराको पछि नलागौंः प्रदेश सांसद पाठक

यज्ञराज उपाध्याय, काठमाडौं । नेकपा (एमाले) का नेता तथा सुदूरपश्चिम प्रदेश सभा सदस्य धर्मराज पाठकले मुख्यमन्त्री राजेन्द्र सिंह रावलले विश्वासको मत पाउने दाबी गरेका छन् ।

सेतोखबरकर्मी सँगको कुराकानीमा उनले रावलले विश्वासको मत पाउनेमा ढुक्क भएको बताएका हुन् ।

नागरिक उन्मुक्ति पार्टीका ७ जना प्रदेश सभा सदस्यको समर्थनमा मुख्यमन्त्री बनेका उनलाई विश्वासको मत नदिने उन्मुक्ति पार्टीले मंगलबार निर्णय गरिसकेको बताइएका बेला पाठकले बाहिर आएका कुराको पछि नलाग्न आग्रह समेत गरेका छन् ।

सभामुखको चुनावताका पनि मत नदिने भनेको उन्मुक्ति पार्टीले अन्ततः मत दिएको उदाहरण दिदै उनले मुख्यमन्त्री विश्वासको मत पाउने बताएका हुन् ।

“बाहिर आएका कुराको पछि नलागौं मुख्यमन्त्रीले विश्वासको मत पाउनुहुन्छ,” उनले भने, “सभामुखको चुनावमा पनि मत नदिने भनेको उन्मुक्ति पार्टीले मत दिएको थियो, अहिले पनि दिन्छ ।”

यदि विश्वासको मत नपाए संसदीय प्रक्रिया अनुसार गतिविधि हुने बताउदै नेता पाठकले अहिले त्यतातिर सोच्दै नसोच्न आग्रह गरे ।

यता उन्मुक्ति पार्टीका महासचिव रतन थापाले हिजोसम्म विश्वासको मत दिने भनिएता पनि आज नदिने समाचार देखिरहेको बताए । आफू धनगढी भएकाले सम्पर्क गर्न नसकेको बताउदै आज के निर्णय भयो जानकारी नभएको बताए ।

बुधबार दिउँसो १ बजे प्रदेश सभा बैठक बोलाइएको छ । सोही क्रममा मुख्यमन्त्री रावलले विश्वासको मत लिने कार्यक्रम तय गरिएको छ । गत पुस २७ गते एमालेका १०, माओवादीका सभामुख बाहेक १०, नाउपाका ७ र राप्रपाका १ प्रदेश सभा सदस्यको समर्थनमा रावल मुख्यमन्त्रीमा नियुक्त भएका थिए । विपक्षीमा कांग्रेसका १९, समाजवादीका ४ र स्वतन्त्र १ गरि २४ जना प्रदेश सभा सदस्य छन् । रावललाई मुख्यमन्त्री पद जोगाउन २७ जना प्रदेश सभा सदस्यको मत चाहिएको छ ।