जनतासँग प्रत्यक्ष महत्व राख्ने मन्त्रालयमा हाम्रो दाबी रहन्छ: रास्वपा

काठमाडौँ, १७ पुस । छोटो समयमा जनतामाझ लोकप्रिय भएर उदाएको राष्ट्रिय स्वतन्त्र पार्टी (रास्वापा) यतिबेला सत्ता समीकरणको खेलमा छ । प्रत्यक्षतर्फ ७ र समानुपातिकतर्फ १३ गरि २० सांसदसहित चौथो पार्टीको रुपमा सरकारमा सहभागी रास्वपाले उपप्रधान एवं गृह मन्त्रालयजस्तो महत्वपूर्ण मन्त्रालय पाएको छ ।

यसका अलावा पार्टीले अन्य कुन कुन मन्त्रालयमा दाबी गरेको होला भन्ने जनचासो रहेको छ । एमालेको समर्थनमा नेकपा (माओवादी केन्द्र) ले नेतृत्व गरिरहेको सरकारमा रास्वपा सभापति रबि लामिछानेले उपप्रधान एवं गृहमन्त्रीको जिम्मेवारीसहित सरकारमा सहभागी हुनुलाई समेत महत्वका साथ हेरिएको जानकारहरु बताउछन् ।

“हिजोका दिनमा जसले राजनीतिलाई सहि दिशाबाट अगाडी बढाउन सकेन, व्यवस्था बदले पनि अवस्था बदल्न सकेनन्, यिनीहरुलाई रोक्नुपर्छ भन्दै विरोध गर्ने पार्टी नै आज उनीहरुसँग मिलेर सहभागी हुनु संयोग वा योजना बुझ्न गार्हो छ,” एक राजनीति कर्मीले भने, “राष्ट्रिय स्वतन्त्र पार्टीले सरकारमा सहभागी हुन हतार नगरेको भए हुन्थ्यो, किनकी आर्थिक रुपले वा स्वास्थ्य, शिक्षा, भौतिक पुर्वाधार लगायत अन्य हिसाबले अहिले सरकार सञ्चालन चुनौतीपूर्ण छ, नेतृत्व असफल भए वा नेतृत्वले पुरानै रवैयामा सरकार सञ्चालन गरे त्यसको प्रत्यक्ष असर रास्वपालाई पनि पर्छ र युवाप्रतिको अहिलेको आकर्षण पनि हराउछ ।”

राष्ट्रिय स्वतन्त्र पार्टीप्रति झुकाव राख्ने एकथरी युवाको भनाई पनि यस्तै छ भने अर्काथरी युवा सडक र सदनबाट मात्र नभई सरकारमै गएर मात्र आफ्ना एजेन्डा अनुसार काम गर्न सहज हुने भएकाले रास्वपा सरकारमा जानू राम्रो भएको बताउँछन् । “सञ्चारमाध्यम, सडक, सदनबाट कराएर मात्र केही हुँदैन । मौका आएको बेला त्यसको सहि सदुपयोग गरेर सरकारमै सहभागी हुँदै आफ्ना प्रतिबद्धताहरु पूरा गर्न सकिने भएकाले यसलाई गलत भन्न मिल्दैन,” रास्वपामा आवद्ध एक युवाले भने, “आफ्ना एजेन्डा अनुसार काम गर्न सके जनताले अर्को पटक देशकै नेतृत्व गर्नसक्ने गरि विश्वासका साथ मत दिन सक्छन् त्यसैले सदन, सडकभन्दा पनि सरकारबाटै काम गर्ने मौकालाई पार्टीले सदुपयोग गर्नु त राम्रो कुरा हो ।”

राष्ट्रिय स्वतन्त्र पार्टीका एक नेताले राजनीति सम्भावनाको खेल भएकाले अहिले पार्टी सरकारमा जानू संयोग वा योजना केही नभई आवश्यकता भएको बताउँछन् । कुनै एक दलले मात्र सरकार बनाउन नसक्ने अवस्था भएकाले मिलेर सरकार बनाउनुपर्ने अवस्थालाई मध्यनजर गरेर नै रास्वपा सरकारमा सहभागी भएको उनको धारणा छ । “राष्ट्रिय स्वतन्त्र पार्टी सरकारमा सहभागी हुनु कुनै संयोग वा पुर्वयोजना केही होइन यो आवश्यकता हो”, उनले भने, “हामीलाई आफ्ना एजेन्डाहरुका साथ काम गर्ने अवसर पनि हो यो । यसमा चुनौती त धेरै छन् तर पनि पार्टीको प्रतिबद्धता र एजेन्डाका आधारमा हामीले काम गर्छौं ।”

रास्वपाले सुरुमै एक महत्वपूर्ण मन्त्रालय पाइसकेपछी अब अन्य कुन मन्त्रालयमा दाबी हुनसक्छ भन्ने विषयमा उनले जनतासँग प्रत्यक्ष महत्व राख्ने मन्त्रालयमा पार्टीको दाबी हुने बताए । तथापि अहिले नै कसले कति मन्त्रालय पाउने निक्र्योल भइनसकेको र प्रधानमन्त्रीले यस विषयमा सरकारमा कुन कुन दललाई सहभागी गराउने र कसलाई मन्त्री बनाउने भन्ने विषयमा दलहरुसँग छलफल गरिरहेको र आधिकारिक कुरा बाहिर आइनसकेकोसमेत उनले जानकारी दिए । पार्टी भित्रसमेत यस विषयमा छलफल भइरहेको जानकारी दिदै केही दिनमै पार्टीले निर्णय गर्ने बताए । “रास्वपाले गृह पछि जनतासँग प्रत्यक्ष महत्व राख्ने जस्तै स्वास्थ्य, शिक्षा, कृषि जस्ता मन्त्रालयमा दाबी गरेको छ तर पनि हाम्रो पार्टीले कति मन्त्रालय पाउने भन्ने नै फाइनल नभएकोले ठ्याक्कै भन्न सकिँदैन”, उनले भने, “सरकारमा कस-कसलाई सहभागी गराउने भन्नेमा प्रधानमन्त्रीले छलफल गतिरहनुभएको छ, पार्टी सभापति सँग पनि छलफल भएकै होला ।”

उनले अहिलेको चुतौतिपुर्ण अवस्थामा पार्टी सरकारमा सहभागी भएको र गृह जस्तो महत्वपूर्ण मन्त्रालयको जिम्मेवारी पाएकोले पार्टीका केही महत्वपूर्ण एजेन्डा अनुसार काम हुनेमा विश्वस्त हुने आग्रह गरे ।