अछाममा थपिए २ हजार बढी मतदाता

काठमाडौं, असोज ०६ । अछाम जिल्लामा गत स्थानीय तहको चुनावपछि २ हजार ३ सय ७७ मतदाता थपिएका छन् ।

जिल्ला निर्वाचन अधिकारी कृष्ण सिंह नायकले सेतो खबरलाई दिएको जानकारी अनुसार थपिएका मतदातामा पुरुष १ हजार ५५३ र महिला ८२४ छन् ।

गत स्थानीय तहको चुनावमा ७५ हजार ८३७ पुरुष, ८० हजार ४४१ महिला र २ तेश्रो लिंगी गरि १ लाख ५६ हजार ६५७ मतदाता रहेकोमा अब आउने चुनावमा ७७ हजार ३९० पुरुष, ८१ हजार २६१ महिला र २ तेश्रो लिंगी गरि १ लाख ५८ हजार ६५७ मतदाताले भाग लिने निर्वाचन अधिकारी नायकले जानकारी दिए । ।

उनका अनुसार मतदाता बढेसंगै एउटा मतदान केन्द्रसमेत बढेको छ । मंगलसेन नगरपालिका ३ श्रीनिवास आधारभुत विद्यालय मतदान केन्द्रका रुपमा थपिएको छ । अछाममा १३० मतदान स्थल र २०८ मतदान केन्द्र छन् । यहाँ प्रतिनिधिसभाको लागि दुई र प्रदेशसभाको लागि चार निर्वाचन क्षेत्र रहेका छन् ।

अछामका धेरै युवाहरु रोजगारीका लागि भारत लगायतका मुलुकमा हुँदा यी थपिएका मतदाताले पनि जनप्रतिनिधि छनोटमा महत्वपूर्ण भुमिका खेल्ने सरोकारवालाको भनाई छ ।