ओमानमाथि नेपालको शानदार जित, ११३ रनले पराजित

काठमाडौं । आईसीसी विश्वकप लिग–२ अन्तर्गत अन्तिम शृंखलाको दोस्रो खेलमा नेपालले ओमानलाई ११३ रनले पराजित गरेको छ। मंगलबार ओमानको अल अमेरत क्रिकेट मैदानमा भएको खेलमा नेपालले दिएको २६४ रनको लक्ष्य पछ्याएको ओमान ४० ओभरमा १५० रनमै अलआउट भयो।

टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै २६३ रन बनाएको थियो। जवाफमा ओमानका ब्याटर नेपाली बलरसामु टिक्न नसक्दा नेपालले फराकिलो जित निकालेको हो।

ओमानका लागि कप्तान विनायक शुक्लाले सर्वाधिक ७७ रन बनाए। उनले ८३ बलमा ६ चौका र एक छक्का प्रहार गरे। सातौँ विकेटका लागि जय ओडेरासँग ८३ रनको साझेदारी गर्दै उनले ओमानको पारी सम्हाल्ने प्रयास गरेका थिए। तर, दीपेन्द्रसिंह ऐरीले उक्त साझेदारी तोडेपछि ओमान दबाबमा परेको थियो। जय ओडेराले २५ र जतिन्दर सिंहले १८ रन बनाए।

नेपालका लागि नन्दन यादव र सन्दीप लामिछानेले तीन–तीन विकेट लिए। दीपेन्द्रसिंह ऐरीले दुई तथा करण केसी र ललित राजवंशीले एक–एक विकेट हात पारे।

यसअघि नेपालको ब्याटिङमा कप्तान रोहितकुमार पौडेलले सर्वाधिक ६१ रन बनाए। उनले ६७ बलमा तीन चौका र एक छक्का प्रहार गरे। रोहितले वसिर अहमदसँग चौथो विकेटका लागि ८६ रनको महत्त्वपूर्ण साझेदारी गरेका थिए। वसिरले ३७ रन बनाए।

ओपनर अर्जुन कुमालले ४० र इशान पाण्डेले ३७ रनको योगदान दिए। दोस्रो विकेटका लागि अर्जुन र इशानले ६४ रनको साझेदारी गरेका थिए। दीपेन्द्रसिंह ऐरीले २२, सन्दीप जोराले १० र आसिफ शेखले चार रन बनाए।

नेपालको इनिङ्सको अन्त्यतिर करण केसीले आक्रामक ब्याटिङ गर्दै टोलीको स्कोर उकासे। उनले १६ बलमा चार छक्कासहित ४० रन बनाए। ४९औँ ओभरमा हुसैन शाहलाई लगातार तीन छक्का प्रहार गरेका करणले उक्त ओभरमा २५ रन जोडे। नन्दन यादव सात रनमा अविजित रहे।

ओमानका लागि शाह फैजल, सकिल अहमद र करण सोनाभले दुई–दुई विकेट लिए भने हसन शाहले एक विकेट लिए।

नेपालले यसअघि पहिलो खेलमा क्यानडालाई २४ रनले पराजित गरेको थियो। ओमानमाथिको जितसँगै नेपालले लिग–२ मा लगातार दोस्रो जित निकालेको छ। यस जितबाट नेपालले थप दुई अंक जोडेको छ। ३४ खेलबाट २८ अंक जोडेको नेपाल अंकतालिकाको छैटौँ स्थानमा रहेको छ।