सेतो खबर
काठमाडौं । नेपालमा बोलिने १२४ भाषाको संरक्षण, मातृभाषा पत्रकारिताको विकास तथा भाषा, संस्कृति, पहिचान, मानव अधिकार र लोकतन्त्रको सुदृढीकरणका लागि तेस्रो अन्तर्राष्ट्रिय मातृभाषा पत्रकारिता सम्मेलन–२०८३ ले १९ बुँदे काठमाडौं घोषणापत्र जारी गरेको छ ।
नेपालसहित विभिन्न देशका पत्रकार तथा सञ्चार प्रतिनिधिले घोषणापत्रमा हस्ताक्षर गरी अनुमोदन गरेका छन् ।
नेपाल आदिवासी जनजाति पत्रकार महासंघ (फोनिज) को आयोजना तथा नेवाः पत्रकार राष्ट्रिय दबूको संयोजनमा साउन २४ देखि २७ गतेसम्म काठमाडौंमा सम्पन्न सम्मेलनमा मातृभाषा पत्रकारिता, भाषिक अधिकार, जलवायु न्याय, वन व्यवस्थापन, आदिवासी ज्ञान तथा सञ्चारमाध्यममा समावेशितालगायत विषयमा छलफल भएको थियो ।
घोषणापत्रले मातृभाषामा बोल्ने, लेख्ने, पढ्ने, सूचना प्राप्त गर्ने तथा सञ्चार गर्ने अधिकार सुनिश्चित गर्न विशेष मातृभाषा सञ्चार नीति निर्माण गर्न सरकारसँग माग गरेको छ ।
मातृभाषी सञ्चारमाध्यमलाई समानुपातिक विज्ञापन, अनुदान, सहुलियत, प्राविधिक तथा संस्थागत सहयोग उपलब्ध गराउन तथा मातृभाषी पत्रकारको श्रम, पारिश्रमिक, पेशागत सुरक्षा र अभिव्यक्ति स्वतन्त्रता सुनिश्चित गर्न पनि आग्रह गरिएको छ ।
धर्मादित्य धर्माचार्यलाई राष्ट्रिय सम्मान
सम्मेलनले नेपालका प्रथम मातृभाषा पत्रकार धर्मादित्य धर्माचार्यको योगदानलाई राज्यस्तरबाट सम्मान तथा औपचारिक मान्यता दिन र उहाँको नाममा मनाइँदै आएको मातृभाषा पत्रकारिता दिवसलाई राष्ट्रिय दिवसका रूपमा निरन्तरता दिन माग गरेको छ ।
मौलिक लिपि, लेख्य परम्परा, साहित्य तथा सांस्कृतिक ज्ञानको संरक्षण र पुस्तान्तरण गर्दै विद्यालयदेखि विश्वविद्यालयसम्म मातृभाषामा शिक्षा विस्तार गर्नुपर्ने घोषणापत्रमा उल्लेख छ । एआई, डिजिटल प्रविधि तथा नयाँ सञ्चार माध्यममा सबै भाषाको समान पहुँच र प्रतिनिधित्व सुनिश्चित गर्नसमेत आह्वान गरिएको छ ।
जलवायु न्याय र आदिवासी अधिकारमा जोड
जलवायु नीति, योजना, निर्णय प्रक्रिया तथा जलवायु कोषबाट प्राप्त लाभमा आदिवासी जनजातिको न्यायोचित र प्रत्यक्ष सहभागिता सुनिश्चित गर्न सम्मेलनले माग गरेको छ ।
भूमि, जल, जंगल तथा प्राकृतिक स्रोतसाधनमाथिको पुख्र्यौली अधिकारलाई मान्यता दिनुपर्ने तथा वन, संरक्षण, कार्बन व्यापार र प्राकृतिक स्रोतसम्बन्धी परियोजनामा पूर्वस्वतन्त्र तथा सूचित सहमति अनिवार्य गर्नुपर्ने घोषणापत्रमा उल्लेख छ ।
सञ्चार नीति निर्माणदेखि सरकारी तथा निजी सञ्चारमाध्यमका न्यूजरुम र सामग्रीसम्म आदिवासी जनजाति तथा सबै भाषिक समुदायको समान र अर्थपूर्ण प्रतिनिधित्व सुनिश्चित गर्न पनि माग गरिएको छ ।
सत्यनारायणबहादुर श्रेष्ठलाई संस्थापक अध्यक्षको मान्यता
विसं.२००८ वैशाख ९ गते स्थापित तत्कालीन नेपाल पत्रकार संघका संस्थापक अध्यक्ष सत्यनारायणबहादुर श्रेष्ठलाई नेपाल पत्रकार महासंघको संस्थापक अध्यक्षका रूपमा अविलम्ब मान्यता दिन सरकार र नेपाल पत्रकार महासंघसँग माग गरिएको छ ।
त्यस्तै, विश्वभरका मातृभाषी पत्रकारलाई संगठित गर्दै ज्ञान, प्रविधि र सीप आदानप्रदान गर्ने अन्तर्राष्ट्रिय मातृभाषा पत्रकारिता सञ्जाल निर्माण गर्ने तथा सम्मेलनलाई निरन्तरता दिने प्रतिबद्धता व्यक्त गरिएको छ ।
भाषिक, धार्मिक तथा सांस्कृतिक विभेद र द्वन्द्वको अन्त्य, लोकतन्त्र, समानुपातिक प्रतिनिधित्व, धर्मनिरपेक्षता, स्वायत्तता तथा आदिवासी जनजातिका विशेष र संरक्षित अधिकार सुनिश्चित गर्न विश्व समुदायलाई आह्वान गरिएको छ ।
विभिन्न देशका पत्रकारद्वारा अनुमोदन
काठमाडौं घोषणापत्रलाई नेपालसहित भुटान, भारत, पाकिस्तान, श्रीलंका, बुर्किना फासो, अमेरिका र स्विडेनलगायत विभिन्न देशका पत्रकार तथा सञ्चार प्रतिनिधिले हस्ताक्षर गरी अनुमोदन गरेका छन् ।
घोषणापत्रमा फोनिज अध्यक्ष लक्की चौधरी, उपाध्यक्ष अर्जुन जम्नेली राई, महासचिव समीर बलामीसहित भुटान पत्रकार महासंघका अध्यक्ष रिनजिन वाङ्ग्चुक, सार्क जर्नलिस्ट फोरमका महासचिव महम्मद अब्दुर रहमान, भारतीय पत्रकार संगठनका महासचिव सायद पिर मुस्ताक अहमद, पाकिस्तानका वरिष्ठ पत्रकार हसन राजा खोखार, श्रीलंकाकी वरिष्ठ पत्रकार अमिला मोरमडा, बुर्किना फासोका पत्रकार डा. निआगाने दासमाने, वासिङ्टन डीसीका वरिष्ठ पत्रकार एन्ड्रेस सेगोभिया, स्विडेन पत्रकार संगठनकी सचिव मेरिया भेनेक यिलिकोमीलगायतले हस्ताक्षर गरेका छन् ।
घोषणापत्रले मातृभाषा पत्रकारिताको मुद्दालाई नेपालमा मात्र सीमित नराखी विश्वव्यापी भाषिक अधिकार, आदिवासी अधिकार, जलवायु न्याय र समावेशी लोकतन्त्रसँग जोडेको आयोजकले जनाएको छ ।
घोषणापत्रको मूल सन्देश छ— ‘भाषा बचाउनु भनेको समुदाय बचाउनु मात्र होइन, मानव सभ्यताको ज्ञान, इतिहास र भविष्य बचाउनु हो ।’
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
