पूर्वअर्थमन्त्री विष्णु पौडेललाई थप तीन दिन हिरासतमा राख्न अदालतको अनुमति

काठमाडौं । नेकपा एमालेका उपाध्यक्ष तथा पूर्वअर्थमन्त्री विष्णु पौडेललाई सम्पत्ति शुद्धीकरण कसुरसम्बन्धी अनुसन्धानका लागि विशेष अदालतले थप तीन दिन हिरासतमा राख्न अनुमति दिएको छ।

विशेष अदालतका न्यायाधीशद्वय नारायणप्रसाद पौडेल र उमेश कोइरालाको इजलासले सोमबार पौडेललाई थप तीन दिन थुनामा राखेर अनुसन्धान गर्न अनुमति दिएको हो।

सम्पत्ति शुद्धीकरण विभागले असार ८ गते सुर्खेतबाट पक्राउ परेका पौडेललाई पाँचौँ पटक म्याद थपका लागि अदालतमा उपस्थित गराएको थियो। अदालतको पछिल्लो आदेशसँगै उनीविरुद्ध पाँचौँ पटक म्याद थप भएको छ।

यसअघि अदालतले असार २४ गते चौथो पटक म्याद थप गर्दै चार दिन हिरासतमा राख्न अनुमति दिएको थियो। त्यस्तै असार १८ गते छ दिन, असार १५ गते तीन दिन र असार ९ गते पनि तीन दिन हिरासतमा राखेर अनुसन्धान गर्न अनुमति दिएको थियो।

सम्पत्ति शुद्धीकरण विभागले पूर्वअर्थमन्त्री पौडेलमाथि पदको दुरुपयोग गरी हाल प्रहरी हिरासतमा रहेका व्यवसायी दीपक भट्टलाई सेयर खरिद प्रक्रियामा सहजीकरण गरेको आरोपमा अनुसन्धान गरिरहेको जनाएको छ।

विभागका अनुसार सोही आरोपसँग सम्बन्धित सम्पत्ति शुद्धीकरण कसुरमा थप प्रमाण संकलन र अनुसन्धान जारी रहेकाले अदालतसँग पुनः म्याद थपको अनुमति मागिएको थियो। अहिले उक्त प्रकरणमा विभागले वित्तीय कारोबार, सेयर लगानी र अन्य सम्बन्धित कागजातहरूको समेत अनुसन्धान गरिरहेको छ।