कांग्रेस महामन्त्री गगन थापाको निवास अगाडि शंकास्पद रूपमा गाडी पार्किङ, प्रहरीले अनुसन्धान सुरु

काठमाडौं । नेपाली कांग्रेसका महामन्त्री गगन थापा को काठमाडौं महानगरपालिका–४ रातोपुलस्थित निजी निवास अगाडि सोमबार बिहानदेखि शंकास्पद रूपमा एउटा गाडी पार्किङ गरिएको भेटिएपछि प्रहरीले अनुसन्धान सुरु गरेको छ।

स्थानीयवासीका अनुसार बीएसी ९५७५ नम्बरको उक्त गाडी बिहान करिब ७ बजेदेखि निवासको मुख्य प्रवेशद्वार नजिकै पार्किङ गरिएको थियो। गाडीका कारण सडक साँघुरो बनेको तथा मोटरसाइकलसमेत सहज रूपमा आवतजावत गर्न नसक्ने अवस्था सिर्जना भएको स्थानीयले बताएका छन्।

गाडी लामो समयसम्म त्यही अवस्थामा रहेपछि स्थानीयले सुरक्षा निकायलाई जानकारी गराएका थिए। त्यसपछि नेपाल प्रहरी घटनास्थल पुगेर गाडीको विवरण संकलन गर्नुका साथै त्यसका धनी र चालकको पहिचान गर्ने प्रक्रिया अघि बढाएको जनाएको छ। हालसम्म गाडी कसले र कुन उद्देश्यले त्यहाँ पार्किङ गरेको हो भन्ने खुलेको छैन।

यसअघि सोमबार बिहान नै काठमाडौंका विभिन्न सञ्चारगृहको कार्यालय अगाडि पनि यस्तै शैलीमा बेवारिसे अवस्थामा निजी नम्बर प्लेटका सवारी पार्किङ गरिएका थिए। तीनकुनेस्थित कान्तिपुर पब्लिकेसन्स, नयाँ बानेश्वरस्थित अनलाइनखबर तथा मध्यबानेश्वरस्थित हिमालय टेलिभिजनको मुख्य गेट अगाडि आवतजावतमा अवरोध हुने गरी गाडी पार्किङ गरिएको थियो।

उक्त घटनापछि सुरक्षा संवेदनशीलतालाई मध्यनजर गर्दै प्रहरीले गाडीहरूको आवश्यक जाँच गरेको थियो। कुनै शंकास्पद वस्तु नरहेको पुष्टि भएपछि ट्राफिक प्रहरीले क्रेनको सहायताले ती सवारी हटाएर नियन्त्रणमा लिएको थियो। घटनाबारे प्रहरीले सवारीधनीको पहिचान र उद्देश्यबारे अनुसन्धान गरिरहेको जनाएको छ।

सोही दिन प्रमुख राजनीतिक नेताको निजी निवास अगाडि पनि समान प्रकृतिको घटना दोहोरिएपछि सुरक्षा निकायले यसलाई गम्भीर रूपमा लिएको छ। प्रहरीले घटनास्थल आसपासका सीसीटीभी फुटेज संकलन, सवारी दर्ता विवरणको अध्ययन तथा सम्बन्धित व्यक्तिको खोजी कार्यलाई तीव्र बनाएको जनाएको छ।

प्रहरीका अनुसार अनुसन्धान पूरा भएपछि घटनाको वास्तविक कारण र संलग्न व्यक्तिबारे थप जानकारी सार्वजनिक गरिनेछ।