जेनजी घटनाको जाँचबुझ गर्न रमेश लेखकलाई आयोगले काट्यो पत्र, देउवासँग छलफल गर्दै

काठमाडौं । दौ २३ र २४ गते भएका घटनाको छानबिनका लागि गठन गरिएको जाँचबुझ आयोगले बयानका लागि बोलाएपछि तत्कालीन गृहमन्त्री रमेश लेखक नेपाली कांग्रेसका सभापति शेरबहादुर देउवासँग छलफलमा जुटेका छन्।

आयोगमा दिने बयानबारे आवश्यक परामर्शका लागि लेखक आज महाराजगञ्जस्थित देउवाको निवास पुग्न लागेका हुन्। महाराजगञ्ज स्रोतका अनुसार छलफलका लागि लेखकलाई सभापति देउवाले नै बोलाएका हुन्।

मंगलबार जाँचबुझ आयोगले बयानका लागि पत्र पठाएपछि लेखकले कानुनी र राजनीतिक पक्षबारे परामर्श गरेर मात्र आयोगमा उपस्थित हुने वा नहुने निर्णय गर्ने बताएका थिए। घटनाको संवेदनशीलता र त्यसको राजनीतिक प्रभावलाई ध्यानमा राख्दै कांग्रेस नेतृत्वसँग समन्वयमा निर्णय लिन लागिएको स्रोतको भनाइ छ।

दौ २३ र २४ को घटनालाई लिएर बनेको जाँचबुझ आयोगले घटनासँग सम्बन्धित तत्कालीन जिम्मेवार पदाधिकारीहरूलाई क्रमशः बयानका लागि बोलाइरहेको छ। आयोगको यो कदमपछि राजनीतिक वृत्तमा चासो बढेको छ।