मिराज ढुंगानाले सोमबारदेखि देशव्यापी जेनजी आन्दोलनको घोषणा

काठमाडौं । गरिखान देउ अभियानका संयोजक तथा जेनजी प्रतिनिधि मिराज ढुंगानाले सोमबारदेखि देशव्यापी आन्दोलन गर्ने घोषणा गरेका छन्।

सोमबार काठमाडौंमा आयोजित पत्रकार सम्मेलनमा ढुंगाना समूहले वर्तमान सरकारले जेनजी आन्दोलनको मूल मर्मलाई सम्बोधन गर्न असफल भएको भन्दै सर्वपक्षीय सरकार गठनको मागसहित शान्तिपूर्ण आन्दोलनको सुरुवात गर्ने बताएका हुन्।

ढुंगानाले सबैलाई सोमबार ११ बजे माइतीघर मण्डलामा उपस्थित भएर आन्दोलनमा सहभागी हुन आह्वान गरेका छन्। उनले भदौ २३ र २४ को आन्दोलन कुनै व्यक्तिको ब्राण्ड वा नेता बन्ने माध्यम नभएको पनि स्पष्ट पारे।

उनले वर्तमान सरकार सुशासन र रोजगारी सिर्जनामा ध्यान दिनको सट्टा अनैतिक नियुक्तिहरूमा अल्झिएको र जेनजी आवश्यकतामा ध्यान दिन असफल भएको भन्दै कार्की नेतृत्वको सरकारप्रति असन्तुष्टि व्यक्त गर्दै आएका छन्।