जेनजी मधेसले भन्यो– ‘एमालेले मधेसको शान्ति सुरक्षामै खलल पुर्‍यायो’

बारा । सिमरा विमानस्थल क्षेत्रमा कर्फ्यू लगाउने स्थितिसम्म पुग्नुपर्ने अवस्था सिर्जना हुनुमा नेकपा एमाले नै जिम्मेवार भएको जेन–जी मधेस प्रदेश संयोजक शिव यादवले दाबी गरेका छन्। उनले जेनजी बारा समितिले कुनै पनि रूपमा एमालेको परवानीपुरस्थित कार्यक्रममा अवरोध नगरेको स्पष्ट गर्दै गलत सूचना प्रवाह गरेर आन्दोलनलाई बदनाम गर्ने प्रयास भइरहेको आरोप लगाए।

यादवका अनुसार आज (बुधबार) सिमरा चोकमा जेनजीको पूर्वनिर्धारित कार्यक्रम चलिरहेको अवस्थामा एमाले कार्यकर्ता परिचालित भएर जेनजी बारा संयोजक सम्राट उपाध्यायसहितका सदस्यमाथि कुटपिट गरिएको थियो।

उनले भने— “एमालेको कार्यक्रम परवानीपुरमा थियो। तर कार्यकर्ता सिमरामा आएर जेनजी साथीहरूको अपमान, दुर्व्यवहार र कुटपिट गरे। यो तथ्य हो र स्पष्ट छ।”

उनले हाल बाहिर आएका धेरै सूचनाहरू जेनजी आन्दोलनलाई बदनाम गर्ने उद्देश्यले प्रसारित गरिएको दाबी गर्दै त्यसो नहोस् भनेर आग्रह गरे।

यादवले सिमरामा तनाव बढाउन जिम्मेवार व्यक्तिमध्ये एमाले नेता महेश बस्नेतलाई मुख्य योजनाकारका रूपमा आरोप लगाउँदै भने— “आजको घटनाका योजनाकार महेश बस्नेतलाई मधेस निषेधको व्यवस्था मिलाउन सरकारसँग माग गर्दछु।”

उनले घटनामा संलग्न सबै एमाले कार्यकर्तालाई तत्काल पक्राउ गरी कानुनी कारबाही थाल्न सरकार र सुरक्षा निकायसमक्ष जोडदार माग गरेका छन्।

“मधेसमा एमालेका गतिविधिले शान्ति–सुरक्षामा खलल”

यादवले हालैका दिनमा मधेसमा एमाले कार्यकर्ताहरू निरन्तर उक्साहटपूर्ण गतिविधि गर्दै आएको आरोप लगाउँदै भने— “एमालेका गतिविधिले मधेसको शान्ति–सुरक्षा नै खल्बल्याएको छ। राज्य र राज्यका संयन्त्रले यस विषयमा संवेदनशीलता अपनाई कडा कदम चाल्नुपर्छ।”

यादवले भनेका छन्:

जेनजी बारा समितिले नेकपा एमालेको कार्यक्रममा कुनै प्रकारको अवरोध गरेको होइन । खासमा सिमरा चोकमै आज जेनजीको कार्यक्रम थियो । यो कार्यक्रममा एमालेद्वारा नै परिचालित गुन्डा समूहहरू पसेर बारा संयोजक सम्राट उपाध्यायलगायतका जेनजी साथीहरूलाई कुटपिट गरेका हुन् ।
एमालेको कार्यक्रम परवानीपुरमा थियो । तर, एमालेका गुन्डाहरू सिमरामा आएर जेनजी साथीहरूको अपमान गर्ने, दुर्ववहार गर्ने र कुटपिट गर्ने काम गरेको तथ्य स्पष्ट हुँदाहुँदै पनि कतिपयले गलत सूचना प्रवाह गर्ने प्रयास गरेका छन्, जुन अत्यन्त भ्रामक, पूर्वाग्रही र आन्दोलनलाई बदनाम गर्न गरिएको दुष्प्रयास हो ।
म सबै मिडियाकर्मीसहित सम्बद्ध पक्षहरूलाई यस्ता गलत सूचना सम्प्रेषण नगर्न अनुरोध गर्दछु ।
यो घटना घटाउने कार्यमा संलग्न एमालेका गुन्डाहरुलाई तत्काल पक्राउ गरी कानुनी कारबाही गर्नुपर्छ । आजको घटनाका मुख्य योजनाकार महेश बस्नेतलाई मधेश निषेधको व्यवस्था मिलाउन सरकारसँग माग गर्दछु ।
मधेशमा एमालेले पछिल्लो समय लगातार उक्साहटपूर्ण र तनाव सिर्जना गर्ने गतिविधि गर्दै आएको छ । यसले मधेशको शान्ति सुरक्षामै खलल पुर्‍याएको छ । यस विषयमा संवेदनशीलता अपनाउँदै कडा कदम चाल्न राज्य र राज्यका संयन्त्रलाई म अनुरोध गर्न चाहन्छु ।
शिव यादव
(जेन्जि मधेश प्रदेश संयोजक)