सिमरा घटनामा महेश बस्नेतको पक्षमा उभिए कांग्रेस महामन्त्री शर्मा, प्रधानमन्त्रीलाई ध्यानाकर्षण

काठमाडौँ । सिमरा विमानस्थल क्षेत्रमा जेनजी युवा र एमाले समर्थकबीच भएको झडपप्रति नेपाली कांग्रेसका महामन्त्री विश्वप्रकाश शर्माले दुःख व्यक्त गर्दै घटनामा एमाले नेता महेश बस्नेतको पक्षमा उभिएका छन्। उनले घटनापछि सामाजिक सञ्जालमार्फत प्रधानमन्त्री सुशीला कार्कीलाई प्रत्यक्ष ध्यानाकर्षण गराएका हुन्।

महामन्त्री शर्माले देशभर राजनैतिक भ्रमण र संवादको वातावरण नबने आगामी फागुन २१ मा तोकिएको चुनाव नै प्रभावित हुने भन्दै प्रधानमन्त्री कार्कीलाई तत्काल ध्यान दिन आग्रह गरेका छन्।

आज बाराको परवानीपुरमा एमाले निकट युवा संघले आयोजना गरेको जागरण सभामा सहभागी हुन एमाले महासचिव शंकर पोखरेल, युवा इञ्चार्ज महेश बस्नेतलगायतका नेता सिमरा हुँदै जाँदै थिए। उनीहरू आउने जानकारी सार्वजनिक भएपछि बिहानैदेखि विमानस्थल क्षेत्रमा जेनजी पुस्ताका युवाहरू र एमाले समर्थकबीच झडप भएको थियो। स्थिति नियन्त्रणबाहिर जाने सम्भावना बनेपछि जिल्ला प्रशासन कार्यालय बाराले बेलुका ८ बजेसम्म कर्फ्यू आदेश जारी गरेको छ।

महामन्त्री शर्माले फेसबुकमा लेखेका छन्: 

एमाले चुनावको विपक्षमा उभिएको छ त, उसलाई चुनावमा आउन आग्रह गरौं l मधेस प्रदेशमा सहि कर्म गरेन त, त्यस विरुद्ध दबाब दिउँ l GenZ विरुद्ध आवेगका अभिव्यक्ति दिएका छन् त, संयमले बोल्न भनौं l तर आफ्ना कुरा राख्न कहिँ पनि भ्रमण गर्ने संविधान प्रदत्त अधिकार कसैको पनि कुण्ठित गर्न मिल्दैन l त्यसले झनै द्वन्द्व बढाउँछ, यो समय संयम र एकता राख्नुपर्ने समय हो l
त्यसैले सिमरा घटना दु:खद ! प्रधानमन्त्रीज्युलाई ध्यानाकर्षण- एक फेरा भ्रमणको वातावरण नबनाए, चुनाव कसरी हुन्छ ?
सामाजिक संजाल निषेध विरुद्ध उभिने GenZ कसैको `समाज भ्रमण अधिकार´ विरुद्ध उभिन सक्दैनन् l अत सिमरा घटना GenZ भावना होइन, त्यसको दुरुपयोग हो l निषेधको राजनीति कसैले नगरौं l