सई निर बहादुर खड्का कोशि प्रदेशको ‘महिनाको सर्वोत्कृष्ट प्रहरी’ घोषित

विराटनगर, असार ६ । कोशी प्रदेश प्रहरी कार्यालय, विराटनगरले इलाका प्रहरी कार्यालय, हरैचामा कार्यरत प्रहरी नायव निरीक्षक (सई) निर बहादुर खड्कालाई २०८२ साल जेठ महिनाको ‘सर्वोत्कृष्ट प्रहरी’ (Best Police of the Month) घोषणा गरेको छ।

उक्त सम्मान उनलाई विभागीय मूल्य–मान्यता, आदेश–निर्देशनको पूर्ण पालना गर्दै उच्च मनोबल, साहस र कर्तव्यपरायणताका साथ उल्लेखनीय कार्य सम्पादन गरेकाले प्रदान गरिएको हो।

प्रहरी सई खड्काले जेठ २० गते मोरङको ग्रामथान गाउँपालिका–७ बाट बेवारिसे टाटा सुमो गाडीमा चेकजाँच गर्ने क्रममा २ जना व्यक्ति र ३४७ किलोग्राम ११० ग्राम गाँजा नियन्त्रणमा लिन सफल भएका थिए। उक्त कार्यले लागुऔषध नियन्त्रणमा उल्लेखनीय योगदान पुर्‍याएको छ।

त्यसैगरी, उनले कर्तव्य ज्यान मुद्दामा ५ वर्ष कैद सजाय पाएका एक जना फरार अभियुक्त र विभिन्न मुद्दामा २० लाख ८२ हजार ८ सय रुपैयाँ जरिवाना तोकिएका १४ जना फरार प्रतिवादीहरूलाई कानुनी दायरामा ल्याउन सफल भएका छन्।

जेठ २४ गतेदेखि हराएकी ग्रामथान गाउँपालिका–७ की ८९ वर्षीया तिलमाया खड्काको शव सुनसरी–मोरङ सिँचाइ परियोजनाको नहरमा डुबेको अवस्थामा फेला पारेपछि गरिएको प्रारम्भिक अनुसन्धानमा प्रहरी निरीक्षक खड्काले उल्लेखनीय भूमिका खेलेका छन्।
उनको नेतृत्वमा अनुसन्धान गर्दा मृतकका सुनका गहना एक घरभित्र माटोमुनि गाडेको अवस्थामा फेला परेको थियो। शंकास्पद व्यक्तिलाई नियन्त्रणमा लिई थप अनुसन्धानका लागि कानूनी प्रक्रिया अघि बढाइएको छ।

कोशी प्रदेश प्रहरी कार्यालयले खड्काद्वारा सम्पादित कार्यको उच्च मूल्याङ्कन गर्दै उनलाई जेठ महिनाको सर्वोत्कृष्ट प्रहरी घोषित गरेको हो। यो सम्मानले अन्य प्रहरी अधिकारीहरूलाई पनि कर्तव्यप्रति अझ समर्पित भएर काम गर्न प्रेरणा दिने अपेक्षा गरिएको छ।