राप्रपाले हिन्दुराष्ट्र–राजसंस्था पुनःस्थापनाको माग र गौहत्याको विरोधमा काठमाडौँमा प्रदर्शन गर्ने

यज्ञराज उपाध्याय, काठमाडौं, २५ भाद्र । राप्रपाको पुरानै मुद्दा राजसंस्थाको पुनःस्थापना, हिन्दु राष्ट्र कायम रहदै आएको छ । अहिले संघीय संसदमा १४ जना सांसद बोकेर हिँडेको राप्रपा कोशी प्रदेशमा सत्ता गठबन्धनको तत्कालीन उद्धव थापा नेतृत्वको सरकारका लागि निर्णायक भुमिकामा समेत थियो ।

तथापि यही दलको अर्को मुद्दा भनेको संघियता खारेजी पनि हो । व्यवहारतः आफुले पनि मान्दै आएको संघियता राप्रपालाई चित्तै नबुझेको पार्टीकै नेताहरुले बताउदै आएका छन् । संविधानसहितको राजतन्त्र, देशको मुख्य अभिभावकको रुपमा राजा चाहिरहेको राप्रपाको यो मुद्दा लामो संघर्ष र हजारौं जनताको बलिदानपछि आएको गणतन्त्रका नेतृत्वदेखि नेताहरु कसैलाई ठिक लागेको छैन । उनीहरुले सार्वजनिक कार्यक्रममै यसको विरोध गर्ने गरेका छन् ।

गणतन्त्र आएपछि अबको शासनसत्ता जनताकै हातमा भनिएपनि जनताले अपेक्षा गरे अनुसारका अवस्था बदल्ने उपलब्धिमुलक काम केही नभएको, नेतादेखि उच्च ओहोदामा भएकाहरु मात्र मोटाउदै गएको लगायत कारणले जनतामा व्यापक असन्तुष्टि रहेको कमजोरीको फाइदा उठाउदै जनतालाई व्यवस्थै बदल्ने आवाज उठाउने अभियानमा राप्रपा रहेको सरोकारवालाको बुझाई छ ।

पार्टी अध्यक्ष राजेन्द्र लिङ्देन अहिले देशले हिंडेको मार्ग चित्र परिवर्तन गर्ने समय आईसकेको बताउदै आएका छन् । उनले देश जोगाउन राजा, राजनीतिक दल र जनता बीच नयाँ सम्झौता गर्नुपर्ने धारणासमेत राख्दै आएका छन् । उनी भन्छन्, ‘अहिले देशले हिंडेको मार्ग चित्र परिवर्तन गर्ने समय आईसक्यो । देश जोगाउन राजा,राजनीतिक दल र जनता बीच नयाँ सम्झौता आवश्यक छ ।’

धर्म निरपेक्षता नभई हिन्दुराष्ट्र कायम गर्नुपर्ने अर्को मुद्दा रहेको राप्रपालाई पछिल्लो समय धरानमा गाई गोरु काटेर सामाजिक सञ्जालसमेतमा पोस्ट गरेको घटनाले आक्रोशित मात्र बनाएको छैन, देशको राजधानीमै व्यापक प्रदर्शन गर्नुपर्ने अवस्था आएको छ । हिन्दु सनातनीमाथि प्रहार गरेको भन्दै केही दिन अगाडी मात्र हिन्दु अभियन्ताहरुले देशभर प्रर्दशन गरेका थिए ।

संसदमै यो विषयमा सरकारका गृहमन्त्रीलाई सारा दुनियाँलाई देखाएर अर्काको धर्म, संस्कार, नेपालका बहुसंख्यक नेपालीले हिन्दु धर्म मान्ने भएकाले उनीहरुमाथि समेत प्रहार गरेको र संविधानले नै वर्जित गरेको अपराधलाई गर्नेहरुलाई समेत सरकारले कारबाही नगरेकोमा प्रश्न तेर्साएको राप्रपाले जनसराकारका विभिन्न विषयमा सरकारको खबरदारीका लागि यही बुधबार काठमाडौं भृकुटीमण्डपमा प्रर्दशन गर्ने भएको छ ।

प्रतिनिधिसभा सदस्यसमेत रहेका पार्टीका प्रवक्ता ज्ञानेन्द्र शाहीले उक्त प्रर्दशनका विषयमा छलफलका लागि उपत्यका भित्र रहेका केन्द्रिय सदस्य, जिल्ला अध्यक्ष , जननिर्वाचित सांसद, स्थानिय जनप्रतिनिधि तथा निर्वाचनमा सहभागी उम्मेद्वार प्रतिनिधि र पालिका कमाण्डरहरू, भातृ संगठनका प्रमुख र विभाग प्रमुख समेतलाई अनिवार्य उपस्तिथिका लागि जानकारी गराएका छन् ।

उनले गौहत्याको विरोध, हिन्दुराष्ट्र र राजसंस्था पुनःस्थापनाको माग, संघियता खारेजीको माग, भ्रष्टाचार/महंगी अन्त्यमा लागि दबाब र युवाहरुलाई स्वदेशमै रोजगारी आव्हान गर्न काठमाडौंबाट प्रर्दशनको सुरुवात गरिने जनाएका छन् ।