सुदूरपश्चिममा सभामुख चयनका लागि नागरिक उन्मुक्ति पार्टी निर्णायक, पार्टी भित्रै अन्यौलता

यज्ञराज उपाध्याय, काठमाडौं । सुदूरपश्चिम प्रदेशमा सभामुख चयन अझै हुन सकेको छैन । निर्णायक भुमिकामा रहेको नागरिक उन्मुक्ति पार्टीको तटस्थताका कारण शनिबार पनि उपलब्धि हात लाग्न नसकेको हो ।

सभामुख चयनका लागि दुईपटक चुनाव हुँदा पनि कहिले आफ्नै पार्टीका नेता अनुपस्थित हुने त कहिले सत्ता समर्थक दल तटस्थ बस्दिदा सभामुख चयन हुन सकेको छैन ।

संविधानमा प्रदेशसभाको पहिलो बैठक बसेको १५ दिनमा सभामुख र उपसभामुख चयन गरिसक्नुपर्ने उल्लेख छ । नेपालको संविधान २०७२ को धारा १८२ (१) मा भनिएको छ, ‘प्रदेशसभाको पहिलो बैठक प्रारम्भ भएको मितिले १५ दिनभित्र प्रदेशसभाका सदस्यहरूले आफूमध्येबाट प्रदेश सभामुख र प्रदेश उपसभामुखको निर्वाचन गर्नेछन् ।’ सोमबार अर्थात् आज प्रदेश सभाको पहिलो बैठक बसेको १५ दिन पुगिसकेको छ । आज बस्ने भनिएको प्रदेश सभाको बैठक पनि आइतबार पोखरामा भएको हवाई दुर्घटनाका कारण सरकारले दिएको शोक विदाका कारण मंगलबारसम्मका लागि स्थगित गरिएको छ ।

मुख्यमन्त्रीमा समर्थन गरेको नागरिक उन्मुक्ति पार्टी शनिबार भएको दोश्रो चुनावमा तटस्थ बस्दा यो परिस्थिति उत्पन्न भएको एमालेका केही नेताहरुको धारणा छ । नाउपा भने मंगलबार हुने चुनावमा पनि तटस्थ बस्ने कि मत दिने भन्ने अन्यौलमा देखिएको छ । उक्त पार्टीका प्रदेश संसदीय दलका नेता रामेश्वर चौधरी केन्द्रले गरेको निर्णय अनुसार के गर्ने भन्ने टुंगो लाग्ने बताउछन् । उनले संघीय सरकारलाई समर्थन गर्ने बेलाको छलफलमा माघीमा रेशम चौधरीलाई रिहा गरेर उपहार दिने वचन दिएर कार्यान्वयन नगर्दा शनिबार तटस्थ बस्नुपरेको बताउदै सरकारले आफ्नो माग पूरा गर्नुपर्ने बताए । नेता चौधरीले सोमबार ९आजै० आफ्नो पार्टीको केन्द्रिय बैठक बसेर जे निर्णय हुन्छ त्यही कार्यान्वयन हुने जानकारी दिए । उनले आज आफू गाउँमा भएकाले प्रदेश संसदीय दलको बैठक नबस्ने बताए ।

यता नाउपाका महासचिव रतन थापाले प्रदेश संसदीय दलको बैठक बसेर निर्णय हुने दाबी गरे । तर प्रदेश संसदीय दलका नेताले दिएको जानकारी बताएर प्रश्न गर्दा आफू गाउँमा भएको र अहिलेसम्म छलफल नभइसकेकाले छलफल भएपछी मात्र जानकारी गराउने बताए । प्रदेश संसदीय दलका नेता र पार्टीका महासचिवको कुरालाई केलाउँदा अझै अन्यौलता कायमै रहेको स्पष्ट हुन्छ ।

यदि नागरिक उन्मुक्ति पार्टी तटस्थ बसिरहने हो भने प्रदेश सभा सभामुखबिहिन हुने खतरा बढेको छ । नेपाली काङ्ग्रेस १९ (एक जेष्ठ सदस्यले सभाको नेतृत्व गरिरहेकाले १८), एकीकृत समाजवादी ४ र एक जना स्वतन्त्र सांसदसहित प्रतिपक्षको मत २३ छ भने नाउपा तटस्थ बस्दा एमाले-माओवादीको मत २२ मात्र छ ।

नेपाली काङ्ग्रेसका नेता एवं प्रदेश सांसद मेघराज खड्काले पुस २८ गते पहिलो बैठक बसिसकेका कारण संवैधानिक जटिलता नरहेको बताउदै अबको निकासको रुपमा दुईवटा मात्र विकल्प भएको बताएका छन् । उनले एक सरकारले अविलम्ब नाउपाको माग पूरा गर्ने अर्को नाउपाले समर्थन गरेको दलसँग अलग भएर नेपाली काङ्ग्रेससंग मिल्नुपर्ने । तर यी दुईवटै विकल्प असम्भव जस्तै छन् ।

प्रदेश सभामा सभामुख चयनका लागि पुस २८ मा पहिलो बैठकमा सत्ता पक्षबाट माओवादी केन्द्रका सांसद भीमबहादुर भण्डारीले २६ पाउँदा र विपक्षीबाट नेपाली काङ्ग्रेसका मानबहादुर रावलले २३ मत पाएका थिए भने शनिबार ३० गते भएको दोश्रो चुनावमा नाउपाको तटस्थताले सत्ता पक्षले २२ र काङ्ग्रेसका एक सांसद माघी मनाउन गाउँ गएकाले २२ मत पाएका थिए । नागरिक उन्मुक्ति पार्टीले के निर्णय गर्छ त्यसैले सुदूरपश्चिम प्रदेश सभाले सभामुख पाउने वा नपाउने निर्धारण गर्नेछ ।