सेतो खबर
काठमाडौं । स्थानीय तहलाई दलीय राजनीतिबाट मुक्त गर्नुपर्ने मागसहित गैरदलीय स्थानीय तह निर्माण अभियानले काठमाडौंको माइतीघर मण्डलामा प्लेकार्ड प्रदर्शन तथा ऐक्यबद्धता कार्यक्रम गरेको छ ।
आइतबार माइतीघर मण्डलामा भेला भएका अभियानका अभियन्ताहरूले स्थानीय तहको निर्वाचनदेखि सञ्चालनसम्म दलीय हस्तक्षेप अन्त्य गर्नुपर्ने माग राख्दै प्रदर्शन गरेका हुन् ।
अभियन्ताहरूले स्थानीय तहलाई राजनीतिक दलहरूको स्वार्थ र दलीय खिचातानीबाट मुक्त गरी जनताको प्रत्यक्ष सहभागितामा सञ्चालन हुने स्वायत्त तथा जवाफदेही संस्थाका रूपमा विकास गर्नुपर्ने बताएका छन् ।
उनीहरूका अनुसार स्थानीय तह नागरिकको सबैभन्दा नजिकको सरकार हो । नागरिकका दैनिक आवश्यकता, विकास निर्माण, सेवा प्रवाह र स्थानीय समस्या समाधानमा प्रत्यक्ष भूमिका खेल्ने भएकाले स्थानीय सरकारलाई दलीय प्रतिस्पर्धा र राजनीतिक प्रभावबाट अलग राख्न आवश्यक छ ।
अभियानले स्थानीय तहको निर्वाचनमा राजनीतिक दलको चुनाव चिह्न र दलीय प्रभावभन्दा स्वतन्त्र तथा योग्य व्यक्तिलाई प्राथमिकता दिनुपर्ने धारणा अघि सारेको छ ।
यस्ता छन् अभियानका मुख्य माग
अभियानले स्थानीय तहलाई गैरदलीय बनाउन पाँचवटा मुख्य माग अघि सारेको छ ।
१. स्थानीय तहलाई गैरदलीय बनाउने व्यवस्था कायम गर्नुपर्ने ।
२. स्थानीय तहको निर्वाचन र सञ्चालनमा हुने दलीय हस्तक्षेप अन्त्य गर्नुपर्ने ।
३. गैरदलीय स्थानीय तह निर्माणका लागि आवश्यक कानुन संशोधन गर्नुपर्ने ।
४. स्थानीय सरकारको स्वायत्तता, पारदर्शिता र जवाफदेहिता सुनिश्चित गर्नुपर्ने ।
५. स्थानीय तहको निर्णय प्रक्रियामा नागरिकको प्रत्यक्ष सहभागिता अभिवृद्धि गर्नुपर्ने ।
अभियन्ताहरूले स्थानीय तहमा दलगत स्वार्थ हावी हुँदा विकास निर्माण, सेवा प्रवाह र जनताको आवश्यकताभन्दा राजनीतिक प्रतिस्पर्धाले प्राथमिकता पाउने अवस्था सिर्जना हुन सक्ने बताएका छन् ।
स्थानीय सरकारलाई कुनै राजनीतिक दलको प्रभावमा नभई स्थानीय नागरिकप्रति उत्तरदायी बनाइनुपर्ने उनीहरूको जोड छ ।
कार्यक्रममार्फत अभियानले सरकार, राजनीतिक दल, निर्वाचन आयोग तथा सम्बन्धित सरोकारवाला निकायलाई आफ्ना मागप्रति गम्भीर हुन आग्रह गरेको छ ।
अभियन्ताहरूले गैरदलीय स्थानीय तहको अवधारणा सुनिश्चित नभएसम्म आफ्नो अभियान र आन्दोलन जारी राख्ने बताएका छन् ।
स्थानीय तहको निर्वाचन र सञ्चालनमा दलीय संलग्नता रहने कि नरहने भन्ने विषयमा बहस भइरहेका बेला माइतीघरमा भएको प्रदर्शनले गैरदलीय स्थानीय सरकारको मागलाई पुनः सार्वजनिक बहसमा ल्याएको छ ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
