सेतो खबर
काठमाडौं । प्रथम उपराष्ट्रपति परमानन्द झाले मैथिली भाषामा अनुवादित ‘सम्पूर्ण महाभारत’ ग्रन्थ मैथिली भाषाभाषीको घर–घरमा पुर्याउनुपर्ने बताएका छन् ।
मैथिली गद्यमा अर्चना झाद्वारा अनुवादित ‘सम्पूर्ण महाभारत’ ग्रन्थको विमोचन कार्यक्रममा बोल्दै झाले महाभारत सनातन धर्मावलम्बीका लागि महत्वपूर्ण ग्रन्थ रहेको उल्लेख गर्दै यसको मैथिली भाषामा अनुवाद हुनु महत्वपूर्ण उपलब्धि भएको बताए ।
उनले महाभारतलाई ‘पाँचौँ वेद’का रूपमा समेत मानिने उल्लेख गर्दै यति कठिन र महत्वपूर्ण ग्रन्थलाई मैथिली भाषामा सरल र रोचक ढंगले अनुवाद गरेकोमा अनुवादक अर्चना झालाई धन्यवाद दिए ।
झाले आफूले पुस्तकको सम्पूर्ण भाग पढ्न नसके पनि करिब चार सयदेखि साढे चार सय पृष्ठ अध्ययन गरेको र मैथिलीमा गरिएको अनुवाद निकै रोचक तथा सरल पाएको बताए । महाभारतका गूढ विषयवस्तुलाई समेत अनुवादकले सहज भाषामा प्रस्तुत गरेको उनको भनाइ थियो ।
‘महाभारत कथा नै कथाले भरिएको रोचक पुस्तक हो,’ झाले भने, ‘यसलाई सबैले कम्तीमा एकपटक अवश्य पढ्नुपर्छ ।’
झाले मैथिली भाषामा अनुवादित महाभारत अन्य भाषाका संस्करणभन्दा कम रोचक नरहेको समेत बताए । आफूले हिन्दी भाषामा रहेको महाभारतको टीका पढ्दा प्राप्त गरेको आनन्द मैथिली भाषामा अनुवादित महाभारत पढ्दा पनि प्राप्त भएको उनले उल्लेख गरे ।
उनले रामायणलाई नेपाली भाषामा अनुवाद गरेका आदिकवि भानुभक्त आचार्यले नेपाली साहित्यमा महत्वपूर्ण स्थान बनाएझैँ अर्चना झाले मैथिली भाषामा गरेको महाभारतको अनुवादले पनि भविष्यमा महत्वपूर्ण स्थान हासिल गर्ने विश्वास व्यक्त गरे ।
मैथिली भाषाभाषीको घर–घरमा पुस्तक पुग्नुपर्ने बताउँदै झाले यसको अध्ययनले धार्मिक तथा आध्यात्मिक चेतना अभिवृद्धिमा सहयोग पुग्ने धारणा राखे ।
झाले पुस्तक प्रकाशनमा अर्चना झाको परिवारले गरेको योगदानको पनि प्रशंसा गरे । उनका पति तथा छोराछोरीसहित परिवारका सदस्यहरूले पुस्तक प्रकाशनमा सहयोग गरेको भन्दै उनले सम्पूर्ण परिवारलाई धन्यवाद दिए ।
कार्यक्रममा झाले अर्चना झाको उत्तरोत्तर प्रगतिको कामना गर्दै मैथिली भाषाको साहित्यिक क्षेत्रमा उनको योगदानले निरन्तरता पाउने विश्वास व्यक्त गरे ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
