यातायात व्यवसायीको आग्रह : बिहीबारदेखि टाढा र रातिको यात्रा नगर्नू

काठमाडौं । यातायात व्यवसायीले बिहीबारदेखि टाढा तथा रातिको समयमा यात्रा नगर्न सर्वसाधारणलाई आग्रह गरेका छन्।

नेपाल यातायात व्यवसायी राष्ट्रिय महासंघले विज्ञप्ति जारी गर्दै बिहीबारदेखि असोज १२ गतेसम्म यातायात सेवा सञ्चालन गर्नुअघि बाटोको अवस्था र मौसमबारे अनिवार्य जानकारी लिन आफ्ना सदस्यहरूलाई आग्रह गरेको छ।

महासंघले अत्यावश्यक कामबाहेक लामो दूरीको यात्रा नगर्न सर्वसाधारणलाई समेत अनुरोध गरेको छ।

यसअघि राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि सम्भावित विपद्को जोखिमलाई ध्यान दिँदै सरोकारवालालाई सावधानी अपनाउन आग्रह गरेको थियो।

यसै साता लगातार वर्षा हुने पूर्वानुमानका कारण विभिन्न स्थानमा बाढी, पहिरो तथा सडक अवरुद्ध हुने जोखिम रहेको भन्दै सरकारले समेत नागरिकलाई सतर्क रहन आग्रह गरेको छ।